Kangerlussuarmi Efterskolissaq piareerpoq
Taamaattumik inuusuttut 80-it septembarip ulluisa aallaqqaataaniit saapatip akunnerini 40-ni Kangerlussuarmi efterskolernissaannut periarfissinneqarput. Timersorneq, isiginnaartitsineq, sannaviit pinngorartitsiviit kiisalu atuartitsissutit nalinginnaasut efterskolimi nutaami sammineqartassapput.
Ilinniartussat meeqqat atuarfiannik naammassisimanissaat naatsorsuutigineqarpoq sapaatillu akunneri 40-t qaangiuppata aappaagu aasakkut atuartitsivimmi ataatsimi arlalinniluuniit meeqqat atuarfianni angusarinikuusamik pitsanngorsarnissaat siunertaralugu naliliiffigineqassapput.
Qasigiannguani efterskolimut inuusuttut 150-it inissanut 80-iusunut qinnuteqarsimapput. Taamaalilluni inuusuttut 70-it efterskolerfigerusutaminnut isersinnaanngillat. Taakku inuusuttullu allat meeqqat atuarfiannit ilinniarfinnut allanut isinngitsoortut Kangerlussuarmut maanna qinnuteqarsinnaalerput.
Kangerlussuarmi efterskole Villads Villadsenip Efterskolianut immikkoortutut pilersinneqassaaq.
- Taamatut aaqqissuussiniarneq siulersuisut akuersaarsimavaat, Villads Villadsenip Efterskoliani siulersuisuni siulittaasoq, Nuka Kleemann, taassumallu efterskolit taakku marluk suleqatigiillutik allaffissornikkut allatigullu ingerlatsinissaat naatsorsuutigaa.
