Kangerlussuarmi angerlarsimaffiit ilarpaalui imeqanngitsut
Kangerlussuarmi angerlarsimaffiit 24-t imermik ukiortaamili pilersorneqanngillat.
Angerlarsimaffiimmi taakkua imermik ataasinngormalli pilersorneerupput.
Kangerlussuarmi, Narsarsuarmi Qaarsunnilu imermik pilersuinerit Mittarfeqarfimmiit isumagineqarunnaarlutik Nukissiorfinnit isumagineqalermata taama pisoqarpoq.
Kangerlussuarmili imermik pilersuisunngornerminni ajutoorlutik, Nukissiorfiit pisortaanerata Cicilie Senderovitzip KNR-imut oqaatigaa.
- Imermik pilersuisunngornitsinni ajoraluartumik akornuteqartoornerput miserratissaanngilaq. Tamnna ajuusaarutigeqaarput aaqqilertorniarlutigulu, taanna oqarpoq.
AAMMA ATUARUK Innaallagiaq imerlu akitsulersut
Nukissiorfimmeersut Mittarfeqarfimmeersullu taavalu attaveqaasersuutinut naalakkersuisoqarfiup pisortaa aamma Nunalerinermut, Imminut Pilersornermut, Nukissiutinut Avatangiisinullu Naalakkersuisoqarfiup pisortaa Kangerlussuarmi imermik pilersuinerup akornuteqarnerata qanoq aaqqiinneqarnissaa pillugu ullumi pingasunngornermi nalunaaqutaq aqqanermiit ataatsimiissutigaat.
Imermik pilersuinermik akisussaaffiup tunniunneqarnerani akornuteqarnermut suna peqqutaanersoq, Nukissiorfinnit aatsaat tamatuma kingorna misissorneqassaaq.
Kangerlussuarmi angerlarsimaffinni 24-ni imermik pilersuineq qaqugu aaqqinneqassanersoq pillugu, Cicilie Senderovitz oqaaseqarsinnaanngikkallarpoq.
Kangerlussuarmi imermik pilersuineq januaarip pingajuani ualikkut nalunaaqutaq pingasuniit januaarip arfernani ulloqeqqata tungaanut akornuteqassasoq, Nukissiorfiit nittartagaanni "ingerlatsinermi akornutit" pillugit nalunaarutini allaqqavoq.
Nukissiorfiilli pisortaanerata oqarnera naapertorlugu Kangerlussuarmi imermik pilersuinerup akornuteqarneranik piffissaq taaneqartoq qarasaasiatigut attaveqaataasa ajoquteqarnerannik peqquteqarpoq.
