Kangerlunni qaartiterinerit aavariartussanut aarlerinartorsiortitsisut

- Pissangagaarput, tusatsiakkat malillugit nunap timaani qaartitserisut immaqa kuultisiortunik soorlu tusatsiarikka. Taama oqarpoq Sisimiuni Aalisartut Piniartullu Peqatigiiffianni siulittaasoq Gustav Enoksen.

Uggornassaaq ukioq-manna tuttut piniagaaleruttorfiani qaartiterisut pissutaallutik ajoqusersorneqassappata.

- Aasaq manna saarullinnik iluatsitinngitsoorpugut, tunitsiivilunnermik maani Sisimiuni. Taakkualu isumalluutissaraluagut tuttut tunitsiivilerup kingorna isumalluutissaraluagut taamatut eqqisiivilliorneqassappata unittariaqarput taakkua.

Gustav Enoksen-illu erseqqissaatigaa, tuttut piffinnut toqqissisimaffiginngisaminnut ornigunneq ajormata. Namminerlu eqqumiiginerarpaa piniartut tusarniaaffigineqarsimanngimmata, naak soorlu Kangerlussuarmi, Maniitsumi Nuummilu tusarniaasoqareersimasoq.

- Soorunami unitsissagaluarpakka naalagaagaluaruma, Gustav Enoksen oqarpoq.

Aatsitassaqarnermut Aqutsisoqarfiup Avatagiisinullu Aqutsisoqarfiup E-mailikkut allagaqaasiat naapertorlugu tusarniaasoqareernerarpaat, qaartiterisoqarnissamullu tunngassutilinnut akerliliisoqangaarsimanngitsoq oqaatigeriarlugu qaartiteriffiusussap immikkut eriagisariaqarneranik Qeqqatalumi kommunia oqariartuuteqarsimanerarnagu.

Arlaatigullu misissuilluni qaartiterinerup nalaani eriasariaqartoqassappat, assersuutigalugu tuttut piaqqisarfianiinnera pissutigalugu misissuilluni qaartiterinerit unitsinneqarnissaat naalakkiutigineqarsinnaalluarpoq, tuttullu piaqqineri qaangiussimaleriarpata misissuilluni qaartiterinerit aallarteqqinneqarsinnaallutik.

Qaartiteriffiusussalli, tassa Itilliup Sarfannguillu akornat, immikkut eriarisariaqartutut Avatagiisinut Aqutsisoqarfiup Pinngortitaleriffiullu ataani DCE-meersut nalilersimanngilaat.

Aatsitassanik misissuinissamut akuersissutinik nalunaarsuiffimmi takuneqarsinnaavoq, suliffeqarfiit pingasuusut Sisimiut eqqaanni aatsitassanik ujaasillutik misissuilereersimasut.

Sisimiut avannaani, Attu tikillugu, Greenland Minerals and Energy misissuivoq, kiisalu Sarfannguit Itillillu akornanni Greenland Gold Resources misissuilluni, kiisalu Hudson Resources Itillip eqqaani misissuilluni.