Kangaatsiap eqqaani tunitsivissaaleqineq qaangiutilerpoq
Royal Greenlandip Attumi tunitsivia qanittukkut ammassasoq, suliffeqarfissuaq ilisimatitsivoq.
Kangaatsiap kujataani Ikerasaarsummi aalisartut piffissami sivisuumi tunitsivissaaruteqqareersut, naak aalisartut aalisagaqarluarneraraluaraat, taama pisoqalerpoq.
Royal Greenlandip tunitsivia ulikkaaqqammat taratsunillu amigaateqarmat aalisartut tunisisinnaanngillat, inoqarfinnilu saniliini qaninnerni aamma tunitsivissaqaratik.
Taamaanneralu aalisartunut illoqinarsivoq:
- Tunisisinnaanani kina aningaasaateqassava, naatsumik oqaatigalugu? Nutarterinissamut, soorlu umiatsiakkunnut assigiinngitsunut, ajutoorutta nappaannartussaavugut. Taamatut inissisimavugut, Ikerasaarsummi aalisartoq Kristian Inûsugtoq anersaaruluuteqarpoq.
Royal Greenlandip Ikerasaarsummi tunitsivia sivitsortumik matoqqasoq, taanna oqaluttuarpoq. Paasitinneqarsimavoq, taratsumik amigaateqartoq aammalu qerititsivik ulikkaarsimasoq.
Aalisakkanillu tunisisinnanginneq illoqinarsivoq.
- Ilaanarpoq. Inuttut ikinnartorujuusarpoq, sualummik aasarissinerani silagittumi bundgarninik ningitsigaluarutta. Innarliuttarput tamakku. Naalliunnartorujuusarpoq, taama piniusersorluni.
Kristian Inûsugtoq oqaluttuarpoq, nunaqarfimminni tulattarfeqarnikkut, innaallagiaqarnikkut imeqarnikkullu ajornartorsiuteqarnatik, kisianni tunisassiorfimmi qerititsivik mikivallaartoq. Taamaammat tunisisinnaaneq killilersorneqarpoq.
- Maani sivitsortumik aamma taamaallaat 500 kilo tunisinnaavarput. Taama akii immaqa nungoreerpagut, sulilu tuniseqqissinnaanata, Krisiian Inûsugtoq oqarpoq.
Taassumalu tunitsivissaaleqilluni anersaaruluutai Royal Greenlandimi ingerlatsinermut pisortap, Steen Sørensenip paasilluarsinnaavai.
Tunitsiviullu maanna matoqqaneranut aasaanerani aalisarlualerneq peqqutaatippaa.
Aammali Royal Greenlandip nunaqarfimmi tunitsivimmut tunisanik massakkorpiaq assartuinnginnermut, Royal Arctic Linep Aasianniit nunaqarfinnut aassartuutaata ikkarlisaarsimalluni uninnganera peqqutaatippaa. Royal Arctic Linellu assartuutaata ajutooqqanera, Royal Greenlandip nunaqarfinni tunitsiviisa piffissami aggersumi unikkallartarnissaannik kinguneqarsinnaasoq, ingerlatsinermut pisortaq ilimasaarivoq.
Kisianni Kangaatsiap eqqaani nunaqarfimmiut qiimmallatissaqarput. Tassami Royal Greenlandip Attumi tunitsivia qanittukkut ammassasoq ilimasaarivoq. Inuussutissalerinermi nakkutilliisut akuersissummik tunniussinissaat maanna kisiat utaqqilerpaat.
Tassalu Attormiut Ikerasaarsummut tunisisarsimagaluartut, nammineq nunaqarfimminni tunisisalerpata, Ikerasaarsummiut nunaqarfimminni aalaakkaanerusumik tunisisarnissamut periarfissaqarnerulissapput.