Kamma ApS-imit tunuarpoq

Suliffeqarfik Kamma Aps assartuinermik ingerlatsivik Maniitsumi angerlarsimaffeqartoq, 2008-mi pilersinneqarpoq, Alcoap Maniitsup eqqaani aatsitsiviliorsinnaanera aalajangiunneqarmat.

Aatsitassanut Naalakkersuisuip Kamma ApS-imik piginneqataassutini tunineranut tunngavilersuutigai, Naalakkersuisutut tatiginassuseqarnini innarlisaarneqarsinnaannginneralu pingaartikkamiuk, Ove Karl Berthelsen tusagassiuutinut nalunaaruteqarluni taama allappoq.

Ove Karl Berthelsen assartuinermik ingerlatsivimmik piginneqataanera apriilip qaammataani ukiormanna paasineqarmat, marloqiusamik inissisimanani oqaatigaa.

Ove Karl Berthelsen marloqiusamik inissisimanera taamanikkut isornartorsiorneqarpoq, inuussutissarsiutinut naalakkersuisutut inissimanera - assigisaanillu Alcoap aatsitsiviliorniarneranut akissusaasutut inissisimanera pillugu suliamut attumassuteqarpallaarnera. Pitsaasumik aningaasaliinerummat suliffeqarfimmik piginneqataavunga, Ove Karl Berthelsen isornartorsiorneqarami taamani taama oqarpoq.

- Assartuinermik ingerlatsivimmik alla uangaluunniit pisippat apeqqutaanngilaq, taamanikkut aningaasaliineq pillugu aalajangerneruvoq, Ove Karl Berthelsen apriilip qaammataani oqarpoq.

Suliffeqarfiup piginneqataassutai taamanikkut tuniniarneqarmata pisiarivakka, allamik naamik, Ove Karl Berthelsen oqarpoq  

Kisianni isumai allanngorput, maannalu piginneqataassutini ingerlatseqatigiiffimmi piginneqataasunut tunivai.

Inuussutissarsiornermut Aatsitassanullu Naalakkersuisoq Ove Karl Bertehelsen piginneqataassutinik tunisinera pillugu oqaaseqartiniaraluartsigu radioaviisimit iluatsissinnaasimanngilarput.