Kalaallit umiarsualivimmi pikilialaartitsinermi tupermik atuisarunnaassapput
Kalaallit Illuutaat umiarsualivimmi tupeqarluni ukiormanna naggataamik peqataavoq. Kalaallit Illuutaammi aappaagu Atlantikup Avannaamiut Illuanngortinneqareersimassaaq, ininullu nutaanut, tuperfigisarsimasami akianiittunut, isertersimassalluni.
- Pisariinnerulernissaa assartugassallu ikilinissaat qilaarivarput, aamma tupermiittarnitta cirkusimiittutullusooq ittarnera nuannissaqaaq aammami ataqatigiinnermut iluaqutaasarami, Kalaallit Illuutaanni kulturimik paasissutissiinermillu suliaqartoq, Annette Lyberth oqarpoq.
Havnekulturfestivalimi, kulturikkut pikialaarfiusumi, aappaagu kulturikkut ilanngussassaq allarluinnaassasoq oqaatigaa.
- Illumi namminerisaminik isiginnaartitsivilimmi, neriniartarfilimmi pisiniartarfilimmilu inissisimalerutta allarluinnaassaaq. Taava pissanganarnerusunik aaqqissuussinissarput ajornannginnerulissaaq, aammali tupermi aaqqissuussigaangatta inuppalaassuseq pilersartoq attanniarsarissavarput, nuanneqigamimi.
Islandimiut savalimmiormiullu sullissiviisa suleqatigineri aallartilluareerpoq, Havnekulturfestivalimullu ukiuni kingullerni pingasuni peqataasarnermi Atlantikup Avannaamiut Illuata aqqa atorlugu peqataasoqartarpoq.
Odensep umiarsualiviani aaqqissuussinerit aallartereerput, ilaatigut assammik arsartartut Jakob Larsen, Minik Dahl Høegh aamma Angutimmarik Kreutzmann peqatigalugit meeqqanik arsartitsisoqarluni. Meeqqat ualeru kiinnamikkut qalipanneqarsinnaapput aammalu inuusanik kalaallisuulersuilluni qalipaasoqassalluni, sapaatit akunneratalu naanerani pisussarpassuit ilagaat oqalugiarnerit, kaffillerneq, kalaattoorneq, savalimmiormiut ipullutik takutitsinerat, islandimiut histii islandimiullu erinarsortartuat Lay Low tusarnaartitsissalluni.
Islandimiut, savalimmiormiut kalaallillu arnat Kalaallit Illuutaannik atuisuusut, illutaassami pinnersaatitut iikkamut nivinngagassamik qilattaallutik suliaqarput, soqutiginnittullu ikiuunnissaminnut tikilluaqqusaallutik.
Pisussanut pilersaarutit uani takusinnaavatit:
