Kalaallit Torontomi nittarsaassinerat iluatsilluartoq
Taanna oqaluttuarpoq kalaallit aallarnisaasut arfineq-pingasut ’Indigenous Fashion Week Toronto’-mut peqataaniarlutik qaammaterpassuarni piareersarsimasut. Aallarnisaasullu illup iluani atortussanik ilusilersuinermik, annoraaminernik, pinnersaatinik, eqqumiitsulianik, atisanik allarpassuarnillu kalaallinut tunngasunik ilisarnaatitalinnik suliaqarsimapput.
Tamannalu asuliinnaasimanngilaq, nunatsinnimi tunisassiat soqutigineqartupilussuusimapput.
- Aallarnisaasut tamarmik nioqqutissaminnik tunisaqarput, taamaalillutillu imminnut taaasinnaalerlutik Canadamut nioqqutissiortut, Salik Hard allappoq.
Atisanik takutitsinerit arlallit saniatigut, nunatsinneersut aamma Torontomi pisiniarfiit, saqqummersitsiviit, pisiniarfissuit, ilusilersukkanik pisiniarfiit pissanganartumik oqaloqatigaat.
Aamma Canadami nuna tamakkerlugu niuertarfiit oqaloqatigineqarput, taakkulu kalaallit tunisassiaat soqutigisupilussuuaat, immikkuullarissutut pitsaalluinnartutullu taallugit.
Angalaqatigiit peqataanissartik sioqqullugu neriuutigisimavaat aallarnisaasut imminnut nittarsaatissasut namminnerlu tunisassiatik takutissallugit, nioqqutissanik tunisissasut niueqatigiinnissamillu isumaqatigiissuteqarlutik.
- Tamakkulu tamarmik iluatsipput, allaallu naatsorsuutigisagut qaangerneqarlutik, Salik Hard allappoq.