Kalaallit timersortartut AWG-mi unamminissanut piareerput

Timersortartut nunatsinneersut ippassaq ualilluarnerani Air Greenlandip timmisartorsuanut Kunuunnguamut ilaallutik timersortartuni siullerpaallutik apuupput.

Timersoqatigiit Kattuffiata nittartagaani gif.gl-imi taama allaaserinnittoqarpoq, aamma tassani oqaatigineqarpoq Grande Prairiemi upernaarpalaaqisoq - aputeqarpiarani - issisiullu 0 gradip missaanniittoq. Ullumikkut ulloq timersuutini assigiingitsuni sungiusarnermut atorneqarpoq - taamaalilluni aqagu ammaanersiornermut unamminerillu aallartinnissaannut piareersimasoqarniassammat.

Timersoqatigiit kattuffiata nittartagaa gif.gl unammiuaarnerup nalaani angusanik kikkullu medaaliannannerinik alakkarterivigineqarsinnaassaaq. Kalaallit timersortartut angusaat Radioaviisimit aamma malinnaaffigineqassapput.