Snowboarderluni DM-ertoqarnerani kalaallit takutitsilluartut
Danmarkimi pissartanngorniunnerit Norgemi illoqarfimmi Hønefossimi Ringkollen Parkenimi ingerlanneqarput. Snowboardertartorlu nuummiu tassanngaanniit oqaluttuarpoq pissartanngornissani ilimagisimanngikkaluarlugu.
- Assut nuannerpoq. Ilimaginngikkaluarakku. Sisuffik aallaqqaammut nalunarami. Tinngallaffissat amerlammata sungiunniaqqaarpara, Jonas Strømsted Ringkollenip Facebookimi quppernerani taama issuarneqarpoq.
Taanna Snowball Nuuk sinnerlugu peqataavoq, siornatigullu juniorini Danmarkimi pissartaasimavoq maannalu siullerpaamik seniorit pissartanngorniunnerinut peqataalluni.
Arnani, Nanna Lennert normu 2-nngorpoq Ane Møllerilu normu 3-nngorluni. Taakku Snowball Sisimiut sinnerlugu peqataapput.
Johannes Møller juniorini kuultinnappoq Anthon Siegstadilu normu 3-nngorluni.
Pissartanngorniunnerit peqataasut peertarnerisigut aalajangerneqarpoq. Boardcrossertartut sisamat ataatsikkut sisutinneqartarput apuuteqqaanniuttoqartarluni.