VIDEO Kalaallit sanaartornermik suliallit takutitsilluartut

Kalaallit suleqatigiit quliusut piginnaasatik immikkuullarissut atorluarpaat sanaartorfimmilu suleqatigiinnertik iluarisimaarlugu.

- Ajunngilaq, pitsaaneruvorluunniit, tikisitaqanngilagut maani. Paaseqatigiilluarluta kalaallisut, Erimmut (suliffeqarfiup pisortaa, aaqq.) soorunami qallunaatut aamma oqaluttarpugut, aamma taanna ajunngilaq, sanasut ilaat Storm Mortensen KNR-imut taama oqarpoq.

Pisortallu Erik Nørskovip kalaaliinnarnik sulisoqarnera pissutissaqarpoq.

- Suleriaatsit assigiinngitsut eqqartussagaanni, betoni eqqaaginnarsinnaavara. Oqarsinnaavunga kalaallit betonimik suliaqaraangamik pikkorissorujussuusartut, qaarsoq toqqaannartumik betoniliorfigineqartarmat Danmarkimit allaanerusumik.

AAMMA ATUARUK VIDEO Inuusuttut suliffissaaleqisut sanasutut misiliinertinneqarput

Nørskov Gruppen sulisunik suliassanut assigiinngitsunut immikkut pikkorissusilinnik pisariaqartitsivoq, pisortallu assassorissanik sulialinnik nunaqavissunik toqqaasinnaanini iluaqutissartaqarluarnerarpaa.

- Soorunami sulerusussuseq pigineqarpat nunanit allanit tikisitsinissaq pisariaqassanngilaq, taakkumi aamma assigiinngitsutigut aningaasartuutaasarmata, soorlu angalanerit, ineqartitsineq allallu.

Eqqartuussiviup illutassaa portusuujussaaq, Storm Mortensenillu naammassippat takunissaa qilanaarivaa.

- Portoqaaq, allaavoq. Allaaneruvoq, unami eqqartuussiviugami. Naammassiartoruni pikkunassaqaaq, sanasoq oqaluttuarpoq.