VIDEO Kalaallit saamillu assigiissuterpassuaqartut
Inuiaat saamit kalaallillu assigiissuterpassuaqarnerarpai.
- Meeqqat inuusuttullu oqaatsitsigut inissisimanerat, inuusuttut atugaat, imminut toquttarneq, peqqinnissakkut ajornartorsiutit inuusuttullu isorliunerusunit illoqarfinnut noorarnerat, Liv Inger Somby KNR-imut oqarpoq.
Aamma atuaruk Inuit og samer holder jubilæum
Kalaallit oqaasiisa inuiaat nukittuumik kinaassuseqalersitsinerat Nuummiinnermini maluginiagaasa ilagaat, tamannalu saamit ilinniarfigilluarsinnaagaat isumaqarpoq.
- Norgep avannaani ilarpassuaqarpugut oqaatsiminnik annaasaqarsimasut. Oqaatsit uummarsaqqinneqaleruttorput, maanilu takusinnaavara kalaallit oqaasii atorluarneqartut, KNR-imut oqarpoq.
Liv Inger Somby isumaqarpoq saamit oqaatsitsigut unammilligassaqarluarnerat saamit 50.000-it 80.000-illu akornanniittut nunanut assigiinngitsunut sisamanut siammarsimanerannik ilaatigut peqquteqartoq, tassalu Norgemut, Sverigemut, Finlandimut Ruslandimullu siammarsimagamik.
- Aamma killeqarfippassuaqarpugut, taamaammat maanitulli periarfissagissaartiginngilagut, Liv Inger Somby oqarpoq.
Saamit 20.000-it missaannaat saamisut oqaluttuupput. Taakkunannga 15.000-it Norgep avannaaniipput.