Inuit Saamillu nalliuttorsiorput
Tamannalu nalliuttorsiornertalimmik ataatsimeersuartoqarneranik nalliussineqassaaq, tamannalumi Christiansborgimi aallartinneqareerluni. ICC Saamillu siunnersuisoqatigiivi nunap inuiisa siuttui inuillu pingaarutilimmik inissisimasut arlariit Issittumi ineriartorneq tamatumalu Issittumi najugaqartunut sunniutai pillugit oqallinnissamut qaaqqusimavaat.
Ukiut 40-t matuma siorna - ullumikkut oqallisaasut assingalugit - aatsitassat, nammineq aalajangiisinnaatitaaneq nunasiaataasimanerullu kinguneri eqqartorneqarput. Indianerit siuttuat James Wah-Shees ammaanermi oqalugiarluni ima oqarpoq:
- Nunasiaatillit uatsinnut tunngassuteqartunik uagut, Issittumik piginnittuusugut, qaaqqunata ataatsimiittarneri ukiorpassuarni malittariuarsimavagut. Pisuussutitsinnik atuinermut akisussaaffik annertuallaartoq aqutsisunut avataaneersunut tunniuttarsimavarput. Nunattalu pisuussutai Issittumi ilaqutarisatta atugaannit pingaarnerutinneqarsimapput, Tidsskriftet Grønland taama allappoq.