Qimmeq-projektimi aqutsisoq: Kalaallit qimmii akusanngortinneqassappata isumatusaarnerunngilaq

Kalaallit qimmii qimminik allaanerusunik kinguaassiortinneqassanngillat. Taamaaliornikkut qimmip ineriartornera ajoquserneqarsinnaammat. Qimmeq projektimi aqutsisoq Morten Meldgaard taama oqarpoq.
Assi © : Reimer Mads
oktobarip 17-at 2018 19:43

- Qimmit allaanerusut kalaallit qimmiinut akulerutsinneqarpata kalaallit qimmiat taassumalu piginnaasai tammariartulissapput, Morten Meldgaard oqarpoq. 

Kalaallit qimmii marluk Qeqertarsuarmi kinguaassiortinneqarsimasut ulluni makkunani pasilliutigineqarpoq. 

AAMMA ATUARUK Qimussertartut allamiut qimmiinik akusanngortitsisimasutut pasineqartut

Tamannalu Morten Meldgaardip isumatusaarnerusorinngilaa:

- Tassami taamaaliornikkut qimmip piginnaasai ilisarnaataalu annaaneqarsinnaammata. Kalaallit qimmii ukiorpassuarni uumasuupput, inuiaat inuit aniguiniarnermikkut qimmit iluaqutigisorujussuunikuuaat. Taamaattumik taamatut iliorneq isumatusaarnerusorinngilara.

Kalaallit qimusseqarnermik kulturiat ukiuni 4.000-it sinnilinni atuussimavoq, nunarpullu nunat avannarliit akornanni qimminik qimuttunik najugaqarfiunersaavoq. Taamaammat kalaallit qimmiata ineriartornera immikkuullarilluinnarpoq:

- Ukiorpassuarni uumanermini ineriartornikooqaaq, kalaallinut sullissiuartuullutik nkittuujupput, qasujaatsuullutik issittumullu naleqqulluinnartuullutik. Allarpassuatigullu aamma Kalaallit Nunaannut tulluarluinnartuupput.