Kalaallit qatserisartut Sverigemi qujarunneqartut
Lars Kristiansen, Bûjo Søholm Knud Hammondilu Avannaata Kommuneaneersut Sverigimi suleruttulerput.
- Ullaakkut arfineq marluk qeqqartoq ikuallaffimmukaratta aatsaat unnukkut arfernup eqqaani inigisatsinnut apuuppugut. Unnukkullu ataatsinut aamma suliartoqqilluta, qatserisartup Lars Kristiansenip sulinertik taama oqaluttuaraa.
Taanna, Bûjo Søholm Knud Hammondilu qallunaanik upalungaarsimasunik Stockholmip avannaani Ljusdal Kommunemi orpippassuarnik ikuallattunik qamisaaqateqarput.
Orpippassuit ikuallattut tiffasingaatsiartumiimmata qatserisartut sumiiffik sivisujaartumik ornittaraat Lars Kristiansen oqarpoq.
- 80 kilometeri ingerlareeraangatta 1 time sinnilaarlugu biilinik ornittaratsigu. Taava orpippassuit akornanni slanginik ikuallaffiup siaruatsaaliornissaa annikillisarnissaalu eqqarsaatigalugu slanginik siaartiterivugut.
Suliaq oqimaattoq
Sverigemilu orpippassuit akornanni kiassuarmi sulineq allaaneruvoq, nunatsinnimi assersuutigalugu illut ikuallattut aqusernup sinaanniiittarput:
- Maanili ikuallattoq qaqqamiikkami. Qaqqartaqarnermik. Ilai qattuniusassuit ingerlaarfigisaqattaaratsigit slangit arlallit nassarlugit ingerlasariaqartaratta, oqimaappoq, Lars Kristiansen oqarpoq.
Sverigemi innuttaasut qatserisartorpassuarnit ikiorneqarnertik qujamasuutigalugu takutippaat.
- Ipassingami freerfitsinni pisiniarfimmut alakkaalaaratta innuttaasut ilaasa suminngaanneernersugut aperimmatigut Kalaallit Nunaanneerneraratta assut qujamasuttorujussuupput nuannaralugulu Kalaallit Nunaanniit peqataasoqatoq.
Svenskit naalakkersuisuisa isumaqatigiissusiornerat naapertorlugu, danskit qatserisartoqatigiit, kalaallit ilaaffigisaat aggustip tallimaata tungaanut qatseralutik sulissapput. Danskit upalungaarsimanermut aqutsisui nittartakkaminni taama nalunaaruteqarput.