Kalaallit qatanngutigiit arnat marluk Viborgimi persuttaallutillu ujajaasut

Kalaallit qatanngutigiit arnat marluk vodkamik puiaasat marluk imersimallugit Viborgimi arnaq Vietnamimiu sakkortuumik persuttarsimavaat oqarasuaataalu angallattagaq tillillugu, Viborg Stifts Folkeblad taama allappoq.

Politiit misissuinerisigut Viborgimi kalaallit ornittagaanni ullut arlaqanngitsut qaangiummata nassaarineqarpoq, aammattaaq oqarasuaat angallattagaq arnat tillissimasaat politiit paasiniaarnerminni atorluarsimavaat.

Qatanngutigiit arnat taakku 17-inik 23-nillu ukioqartut,tallimanngormat inatsit tunngaviusoq naapertorlugu killisiorneqaramik novembarip 18-iani vodkamik puiaasat marluk imersimallugit aalakoortupilussuullutik arnaq Vietnamimiu 45-nik ukioqartoq Nellikevej -Marsk Stigs Vejimi Rema 1000-ip eqqaani ujajaaffigalugulu persuttarsimallugu nassuerutigaat.

Arnat tamakkiingajattumik nassuernerat, persuttarneqartup politiinut nassuiaataa kiisalu ajoquserneqarneranut uppernarsaatit aallaavigalugit, eqqartuussisoq aalajangerpoq qatanngutigiit arnat novembarip 20-ianit sapaatit-akunnerini sisamani parnaarussivimmi paarigallagassanngortinneqassasut.

Qatanngutigiit nukarlersaata 18-it inorlugit ukioqarnera pissutigalugu, isertitsivimmi imaluunniit inuusuttunut angerlasimaffimmi matoqqasumi paarigallarneqassanerluni qinigassinneqarpoq. Qatanngutigiit parnaarussivimmi paarigallagassanngortinneqarnermik kingorna inuusuttunut angerlarsimaffianni Grenenimi Grenåp eqqaaniittumiinnissani akueraa.

Imigassartorpallaarsimanertik pissutigalugu arlartik susimanersoq assigiinngitsunik nassuiaateqarfigisimavaat, arnarli kangiamiu aqquserngup illuatungaaniittut attavigisimavaat.

Qatanngutigiit kalaaliunersoq suaartarlutik aperisimavaat, immaqa nunaqqatiginasoralugu aningaasanik sikaratsinilluunniit qinuniarlutik.

Nunaqqatiginagu paasigamikku arnaq nunamut uppisissinnarlugu tilluarlugulu nukkarsimavaat, aamma savinermik anaalerummillu nassaasimasaminnik anaalersimapput.

Arnaq persuttarneqartup ajoqusernerisa assilineri eqqartuussivimmi aamma saqqummiunneqarput.

Ujajaaffigineqarnermi kinguninnguaq tallumigut, qaamigut tullermigullu, ikusimmigut paffimmigullu ajoqusersimaneri ersaripput. Aqaguanilu pineqartuni timimigullu allatigut tungujornertitersimavoq.

Qatanngutigiit arnap persuttakkamik oqarasuaataa angallattagaq Nokia tillippaat, nukarliullu suaartarpaa politiinut oqaatiginnikkalluarpat toqunniarlugu sioorasaarlugu.

Qatanngutigiit taakku marluk aalajangersimasumik najugaqannginnertik pissutigalugu oqatussasunit ujaarineqareersimapput.

Nukarleq siornatigut angerlarsimaffimmut inissinneqareersimavoq aammalu pisiniarfimmut tillinniarsimanini ikiaroornartunillu paarisaqarnini pissutigalugu politiinit tigusaasimalluni. Viborgilli Kommunianut attaveqalernermi kingorna sulerisarnera aqukkuminarnerulersimavoq. Angajua arlaleriarlugu annikinnerusunik tillinniartarsimanini pisiniarfinnullu tillinniartasimanini pissutigalugit politiinit misissuiffigineqarpoq.

Qatanngutigiit angajullersaat, isai immartersimallutik qiallunilu, eqqartuussisoq oqarfigaa ajuusaartupilussuulluni aammalu inoqatiminik annersaasatuunngikkaluarluni.

»Taamaalioqqinnavianngilanga,« neriorsuivoq.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat