Kalaallit peqqissuunerulertariaqarput

Inussuit nalunngilavut, pinngortitami qaqqajunnannguit qaavini inussuliarineqartartut, pinngortitami sumiiffinni nasiffinniluunniit ilisarnaatigineqartartut.

Innuttaasut peqqissuunissaannut pilersaarusiaq nutaaq Inussummittaaq taaguuteqarpoq. Nalunaarusiaq nunatsinni innuttaasut peqqinnerulernissaannik suleriarnissami sakkussatsinnik pissarsiorfissaavoq. Innuttaasut nappaatinik eqqorneqartarnerat isiginiarneqassaaq, nuffasertarneq pinngikkaluarlugu -  nappaatilli  inuunitta sivisunerusinnaaneranut pitsaasuunissaanullu sunniuteqartartut inuunitsinni  isiginiarneqassapput.

Naalagaaffiup peqqissutsimut pisortaqarfianeersoq proffessor Peter Bjerregaard misissuinermi sulialik nunatsinni peqqissutsikkut nappaataanerpaatut makkuunerarpai:

- Kalaallit Nunaanni innuttaasut peqqissutsikkut nappaatini ajornartorsiutaanerpaat qangali ilisimasagut tassaapput, imigassartorpallaarnerup pujortarpallaarnerullu kinguneranik toqujaartarneq, nappaatillu pilertarneranut pissutaasut, kiisalu inuusuttut imminortarnerat.

Ukiuni kingullerni inuusaatsip nereriaatsillu allanngorsimanerata ersiutigaa nappaatit nutaat atugaalersimaneri, tassalu uummatip taqarsuatigut nappaateqarneq, sukkorneq kiisalu timitta aalatinngippallaarnerata kingunerisaanik nappaatinit assigiinngitsunik eqqorneqartarneq, Peter Bjerregard nassuiaavoq.

Innuttaasut peqqinnerulernissaannut pilersaarusiaq 2006-miit 1012-p tungaanut ingerlanneqassaaq. Innuttaasullu inuusaasiat 10012-p tungaanut allanngorsimanersoq taamanikkut takuneqarsinnaalissaaq. Suut tamarmik atorneqartariaqarput, pinaveersaartitsinerlu kisimi naammanngilaq, inuusaatsilli allanngortinnissaa pisariaqarluni, Peter Bjerregaard oqarpoq.

Ilanngu oqaatigaa, inuusaatsimik allanngortitsinissaq anguniarneqartariaqartoq. Takorluugaasalu ilagaat nerisassat peqqinnanngitsut akiisa qaffaavigineqarsinnaanissaat, soorlumi imigassap akitsuiffigineqarnerata kingunerigaa imigassartornerup appaallassimanera. Taanna aqqutissaasinnaasoq Peter Bjerregaardip oqaatigaa.