Kalaallit peqataatitaat aallartilluartut

Jens Jørgen Lange Uummannameersoq ikinnerpaamik ataatsimik kuultinnassimalluni Alaskamit aallarsinnaanngorpoq. Taannami ippassaq Dene Gamesimik unammisoqarnera stick pullimi nunaqqatini Minik Platou ajugaaniutivinnermi ajugaaffigalugu kuultinnappoq. Timersuu taanna tassaavoq qisummik qaqorsaammik pujassaasikkamik eqitarneq.

Mathias Mark Nuummeersoq 16-inillu ukioqartoq aamma kuultinnassimalluni angerlarsinnaanngorpoq, taannami ippassaq snowboardimik sangusaarnermi normu 1-inngorpoq.

Kalaallit Nunaat Dene aamma Inuit Gamesimi nalinginnaasumik nukittuumik inissisimasutut oqaatigisariaqarpoq. Minik Platou Nuummeersup stick pullimi sølvinnannerata saniatigut, aamma Tonny Fisker Nuummeersoq kneel jumpimi sølvinnappoq, tassalu seeqqummersinnarlugu qummut pisseriaqattaarnermi, Benediktus Jakobsen Ilulissaneersoq one hand reachimi aamma sølvinnappoq, tassalu assammik ataatsimik imminut kiveriaqattaarnermi.

GIF-illu siulittaasua naammagisimaarluartoq KNR-imit ippassaq oqaloqatigaarput.

- Arctic Winter Games aallarteqqammepoq, maannamullu ingerlalluarpugut. Peqataasut nunartik sinnerlugu ilungersornissaminnut piumassuseqarluarput, Nuka Kleemann oqarpoq.

GIF-ip ukiormanna AWG-eqarnerani anguniagaa tassaavoq kalaallit 50-inik ujaminnannissaat, aammali misigisaqarluarnissaq pingaaruteqartoq Nuka Kleemannip oqaatigaa.

- Peqataasut inuunermik sinnerani eqqaamasassaminnik misigisaqarsimallutik nutaanillu ikinngutitaartorsimallutik angerlarnissaat neriuutigaarput.

Alaskamiut maannamut ujaminnannerpaagallarput. Kuultit aqqaneq-marluk, Sølvit qulit bronzellu qulingiluat.