Kalaallit palasissat Aarhusimi atorfinitsilerpaat

Danmarkimi ilageeqarnermut ministeriaqarfiup kalaallit Danmarkimiittut palasissaata inuttassarsiorneranik nalunaarut ullumi saqqummiuppaa. Palasinngortussaq Aarhusip biskoppiata Kjeld Holmip ataani atorfeqartinneqassaaq. Maannali suli nalunarallarpoq Aarhusimi oqaluffimmi sorlermi kalaallit palasissaat naalagiartitsisassanersoq.
Allattoq Martine Lind Krebs, Noah Mølgaard
januaarip 15-at 2013 06:24

Kalaallit palasitaarnissaat sivisuumik utaqqisaavoq. Kalaallit Danmarkimi najugallit Danmarkip aningaasalersugaanik palaseqalernissaannik kissaat 2010-mi saqqummiunneqaqqaarpoq. 2011-mi Danmarkimi ilageeqarnermut ministerinngortoq Manu Sareen nalunaarpoq aasap ingerlerani atorfik inuttassarsiorneqassasoq.

Tamannali kinguaattoorsimavoq aningaasalersorneqarnissaa inatsisitigullu tungavissaa inissinneqaqqaartussaammata tamatumalu kingorna Aarhusimi oqaluffimmi sorlermi sulissanersoq inissinniarneqarpoq.

Psykoterapeut Henriette Berthelsen aamma facebookimi '’Kalaallit Ilagiit Danmarkimi’-mik pilersitsisoq suliamut malinnaaqqissaarpoq. Taamaammat taanna nuannaaqisoq KNRimit ullumi attavigineqarpoq.

- Kiisami. Nuannaaqaanga. Pisoqarnissaanut piffissanngorpoq. Maanna pissanganartua unaalerpoq palasi kinaassanersoq, oqarpoq.

Illuatigulli isumakuluutigaa palasinngortussaq ikiorteqarani Danmarkimi kalaallinik sullissisinnaanersoq. Aasaq kingulleq aallartiffigalugu Namminersorlutik Oqartussat Danmarkimi palaserisaata kuisinissaa, apersortitsinissaa, katititsinissaa aamma ilisinissaa nammineq Danmarkimut nuussimasunut ajornartitaalerpoq. Tassani tunngavilersuugaavoq palasip angalanermut aningaasartuutai sipaarniarfigineqassammata.

Palasissarsiornermi qinnuteqarnissamut periarfissaq kingulleq tassaavoq februaarip sisamaat.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq