Kalaallit oqaasii ilinniarnertuunngorniarfinni aallaavigineqalissapput

'Oqaluttuarisaanitsinni nutarterineq kusanartoq pisariaqartorlu', Inatsisartuni partiit amerlanersaat taama naliliipput.

Nutarterinermili aningaasaliissutissat suli ilaat amigaataasut, Ilinniartitaanermut Naalakkersuisup oqaatigaa, neriorsuillunili aappaagumut Aningaasanut Inatsisissap piariinnginnerani aningaasanik nassaarniassalluni. Aningaasalli suli iluamik inississorneqanngikkaluartut, tassa aappaagumiit Ilinniarnertuunngorniarfik nutartigaq aallartissaaq, ilinnialersussanut piumasaqaatitaqagaatsiartumik.

- Siunissami Ilinniarnertuunngorniarfinnut qinnuteqartut ilinniagassanik aallarluinnarnik atugassaqalersussaapput, neriuutigaaralu tamanna maluginiarneqarumaartoq. Ilinniarnertuunngorniarfinnut qinnuteqarlutik isertut naatsorsuutigissavaat, taakkunani ilinniartitaaneq qaffasissammat, tassami siunertaavoq Ilinniarnertuunngorniarfinni piareernerup kingorna qaffasinnerusunut ilinniarfissanut Ilinniarnertuunngorniarfik piareersarfiummat qaffasissoq. Tamannalu paasilluarnaqqoqaaq, Ilinniartitaanermut Naalakkersuisoq, Palle Christiansen oqarpoq.

Ilinniartitaaneq Naalagaaffimmit Nunatsinnut oqartussaaffigitinneqalermat, tamanna Nunatsinni inuiattut oqaatsigut kulturerpullu eqqaarsaatigalugit, alloriarnerit pingaarutillit ilagigaat, Ilinniartitaaneq pillugu Inuit Ataqatigiit oqaaseqartartuata, Juliane Henningsenip oqarpoq nangillunilu:

- Kalaallit oqaasii pingaaruteqarput, una pissutigalugu, kalaallit oqaasii aallaavigalugit ilinniartitaaneq ingerlanneqartalissammat, imaappoq ilitsoqqussaralugu kalaallisut oqalukkaanni taava allamiut oqaasiinik ilinniartitaaneq ilinniartitseriaatsillu allaanerusut atorlugit ilinniartitsisoqartalissammat, tamanna alloriarneruvoq pitsaalluinnartoq, Juliane Henningsen oqarpoq.

Inunnguuseralugu oqaatsit salliutinneqassasut, Atassummit Knud Kristiansenip piumasaraa:

- Ajornanngippat Atassummit piumasaraarput, inunnguuseralugu oqaatsit atorlugit ilinniartitsisoqartalernissaa aammalu ilinniartut pisinnaasaat najoqqutaralugit ilinniartitsisoqartalernissaa. Ilinniartitsisussaaleqinerli aporfiussappat allatut aaqqiisoqarnissaanik siunnersuutaajumaartunut isumaqataanissarput naatsorsuutigineqarsinnaavoq, Knud Kristiansen oqarpoq.

Meeqqat atuarfiannit naammassillutik Ilinniarnertuunngorniarfinnullu qinnuteqartartut aallartiinnagajavillutik taamaatiinnartarneri aammalu piareersimanatik aallartittartut kissaatiginanngitsut, Ilinniartitaanermut Naalakkersuisup ersarissumik oqaatigaa:

- Ilinnialersussat piareersimanngitsut Ilinniarnertuunngorniarfinni aallartittarnissaat kissaatiginngilluinnarpara. Qaffasinnerusumut ilinniarnissaminnik kissaateqartut, tamassuminngalu angusaqarusuttut Ilinniarnertuunngorniarfinni atualersussat kissaatigineruvara, tassami tamassuma nassatarissavaa, klassini toqqissisimallutik atuartarnissaat, taamaalinikkut taamaatiinnartartut ikilisinneqassammata, Palle Christiansen oqarpoq.

Demokraatit oqaatigaat Ilinniarnertuunngorniarfimmut isernissamut piumasaqaatit qaffasippallaarpata ilinniartut katataasut amerlinissaat ernumanartuusoq.

- Meeqqat atuarfiannit ingerlaqqikkusuttut eqqarsaatigalugit, annilaangassutigaarput Ilinniarnertuunngorniarfinnut isernissamut piumasaqaatit qaffasippallaarlernissaat, tassami patajaatsumik ernumananngitsumillu ikaarsaariartoqartassappat aammalu katataasut amerlavallaassanngippata aaqqissuussineq ajunnginnerpaaq nassaarisariaqarparput, Inatsisartuni ilaasortaq Demokraatineersoq Andreas Uldum taama oqarpoq.

Nunatsinni Ilinniarnertuunngorniarfinnik nutarsaareerneq 2012-imi atulissaaq.