VNTM-imi peqataasoq: Kalaallit Nunaata takornariaqarlualernissaa qularutiginngilara
Allaatiginnittartoq, Koreameersoq nunarput pillugu taama oqarpoq, taassumalu nunatsinni takornariaqarlualernissaa qularutiginngilaa.
- Maannamuinnaq takusakka tupinnaqaat, Alaskami angalatitseqatigiiffiit ilaanneersoq, Runaway Juno Mediamilu allaatiginnittartoq, Juno Kim oqarpoq.
Taassumalu nunatta takornarianut amerikameersunut pilerisaarutiginissaa piuminassangatippaa.
Inuit alutorilluarai
Ukiumoortumik takornarialerinerujussuaq, Vestnorden Travel Mart ippassaq naggaserneqarpoq. Tassani nunat avannarliit killiit Island, Savalimmiut nunarpullu soqutiginnittunut nunarsuarmit tamarmeersunut pilerisaarutigineqarput.
Juno Kimillu Kalaallit Nunaanni inuit alutorilluagaasa ilagaat.
-Silatullutillu alutornaramik. Nalitsinni nunarsuarmioqatitta kalaallit ilisimaarinerusariaqarlugillu ilinniarfigisariaqaraat isumaqarpunga, Alaskami najugalik nittartakkakkullu allaaserinnittartoq Juno Kim oqarpoq.
AAMMA ATUARUK Nunarput soqutigineqarluartoq
Naak nunatta attaveqaatersuutai pitsaanerpaanngikkaluartut, nunatsinnut angalanissap ajornanngissusia inuppassuit paasisimagaat, Juno Kim isumaqarpoq.
Taamaattumik takornariat nunarsuup qeqertani annersaannukaajumanissaat qularutiginngilaa.
- Timmisartukkut angallassinerulerneq Kalaallit Nunaannilu takorniarialerisut sulilluarmata Kalaallit Nunaannukarneq ajornanngitsuusoq takornariat ilisimaarilersimavaat, Juno Kim oqarpoq.
