Kalaallit Nunaata Inuit Pisinnaatitaaffiinut Siunnersuisoqatigiivisa utaqqisitsiuarsimaneq unittariaqalersoraat
Inatsisitigut ataataqanngitsut taarsiivigineqarnissaat pillugu isumaqatigiissuteqarniarlutik Naalakkersuisut danskit naalakkersuisuinut saaffiginnissuteqarsimapput, tamannali ajoraluartumik angusaqarfiusimanngilaq. Taamaammat inatsisitigut ataataqanngitsut akissuteqarfigineqarnissaminnik utaqqiuarsinnarput.
-Nunatsinni inatsisitigut ataataqanngitsunik nalornisitsineq utaqqisitsiuarnerlu nanginneqartoq akuerineqarsinnaanngilaq, inuit pineqartut unneqqarissumik naapertuuttumillu pineqarnissamik pisinnaatitaaffeqarnerisa ajorquserujussuarnissaata killerpiaaniimmat, Inuit Pisinnaatitaaffiinut Kalaallit Nunaata Siunnersuisoqatigiivini siulittaasoq Hjalmar Dahl oqarpoq
Politikkikkut sulineq maannamut pitsaasumik ingerlanneqarsimasutut Dahlip nalilerpaa, inaarutaasumilli aalajangiisoqarnissaanik ujartuilluni. Taamaammat Kalaallit Nunaata Inuit Pisinnaatitaaffiinut Siunnersuisoqatigiivisa politikerit isumaqatigiinngissutitik piunnaarlugit tamat atorsinnaasaannik aaqqiissuteqarniarnissaat kissaatigaat.
- Ukiorpassuarni inunnik pineqartunik nalornisitsillu utaqqisitsiuarsimaneq unittariaqalersoq, tamannalu naalakkersuinikkut piumassuseqaraanni ungasinngitsumi anguneqarsinnaasoq isumaqarpunga, Hjalmar Dahl isumaqarpoq.
