Kalaallit Nunaata Caroline Wozniackia

Taama allappoq norskit aviisiat Dagbladet. Sisoraatinik oqilaniuttartoq Niviaq Chemnitz Berthelsen pillugu allaaserinnipput pingasunngornermi anngunniunnermi 5 kilometerimut ajugaareersoq Norgemi VM-rtoqarnerani.
Allattoq Noah Mølgaard
februaarip 24-at 2011 07:03

Unammineq sioqqullugu ajugaassatinneqareerpoq aammalu ilimagisaasut eqquutsillugit tullersortiminit sekundit 40-t sinnerlugit sukkanerulluni ajugaalluni. Tassa Niviaq Chemnitz Berthelsenip pingasunngornermi angusaa.

Danmarkimilu tennisertartumut Caroline Wozniackimut assersuunneqarneranik aallartitsisoq tassaavoq Flemming Enequist Kalaallit Nunaanni sisorartartut kattuffianneersoq.

Taassuma Niviaq nersorpaa piukkunnaateqarluarmat aammalu sungiusarnissamut piumassuseqartuummat. Aamma qilanaarinerarpaa Niviaq Chemnitz Berthelsenip siunissami unammisarnissaasa malinnaaviginissaa timimigut inerissimaneruleriarpat. Taama Dagbladetimi issuarneqarpoq.

Niviap maanna qilanaarai ilaquttami Oslomut tikinnissaat unamminermini tapersersuiartorlutik tikittussaammata. Niviaq Norgep avannaani Nordreise-mi ilinniaatigaluni sisorarnermik sungiusarpoq.

- Tassani suli najugaqarallassaanga. Neriuppunga aamma erininarserianngitsoq pikkorinnerit unammisalerumaarlugit, aamma OL ukiut marluk qaangiuppata pisussaq anguniakkama annersaraat, taama Niviaq Chemnitz Berthelsen Dagbladet-imut oqarpoq.

Unammersuarnerit sisamanngornermi ingerlaqqippata naatsumut unamminermi Niviaq Chemnitz Berthelsen unammeqataassaaq.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq