Kalaallit Nunaat tusarniarneqaqqaartassaaq
Taama pisoqarpoq video atorlugu meeqqat killisiorneqartarnissaannut inatsisip allanngortinneqarnera piaarpallaamik suliarineqareersorlu. Kalaallit Nunaat pillugu ataatsimiititaliaq taama isummerpoq Inuit Ataqatigiit sinnerlugit ilaasortaq Aaja Chemnitz Larsen isornartorsiuteqareersorlu.
Danskit naalakkersuisuisa siuliisa inatsisissatut siunnersuut meeqqanik videokut killisiuisarneq ukiunut 15-inut killilerniarmassuk tusarniaassutigineqarpoq. Taamani kissaatigineqarmat inatsit Danmarkimut, Savalimmiunut Kalaallit Nunaannullu atuutissasoq, kissaatigineqarsimavoq Inatsisartut aamma siunnersuut pillugu tusarniaavigineqassasut.
Suliarli Inatsisartut ukiakkut ataatsimiinneranni marloriarluni kinguartinneqarsimavoq, aatsaallu upernaamut ataatsimiinnissamut aprilip arfineq pingajuanni aallartittussamut kinguartinneqarsimalluni.
Inatsisinik atuutsitsinermut ministereqarfiup kissaataanut aporaappoq, taakkumi kissaatigimmassuk inatsit ukioq manna apriilip aallaqqaataaniit atuutsilersinneqassasoq. Taarsiullugu Folketingip inatsisissatut siunnersuut novembarimi siullermeerpaa.
Inatsisinut atuutsitsinermut ministereqarfiup Kallaalit Nunaat pillugu ataatsimiititaliamut allappoq, Inatsisartut isumaqatigiittut video atorlugu killisiuisarnerit ukiunut 15-inut killilerneqarnissaat tapersersimagaat.
Inatsisartulli akisimatinnagit Folketingip siunnersuut sammisinnaanngikkaa, ministeriuneq allakkamini uparuaavoq.
Namminersornerli pillugu inatsimmi allassimavoq Inatsisartut suliarereersimassagaat Folketingimi sammineqartinnagu - sulialli nukingiussat Folketingilu ataatsikkut oqaluuserineqarsinnaasut.
Inatsisinut atuutsitsinermut ministeriaqarfik Naalakkersuisullu maanna isumaqatigiissuteqarsimapput inatsisissatut siunnersuut Inatsisartuni oqaluuserineqareerpat upernaamut Folketingimi sammineqarumaartoq.
