Kalaallit Nunaat Tivolimi atuaqatigiiusimasut naapeqqinnerannit tunngaveqartoq

17-it 18-illu akornanni ukiullit 1976-imi Tivolimi naapeqqaarput. Taakkunani ilaasoq, Sidsel Møller taama oqaluttuarpoq.

- Samuel Kleinschmidtip atuarfiani Nuummiittumi atuaqatigiiuvugut, naggataamik soraarummeereertut. Ikinngutigiittorujussuuvugut, tamattali Danmarkimut ilinniariartorluta. Taamaammat soraarummeernitsinnit ukiup tulliani naapeqqittariaqartutut misigavugut. Taamaammat sumiiffimmi ullormilu eqqaamajuminartumi naapissasugut isumaqatigiippugut. Tassalu Tivolimi aggustip aallaqqaataani 1976-imi nalunaaqutaq 18:00 naapittussanngorluta, Sidsel Møller oqarpoq.

Tamatuma kingorna inuppassuit Nunatsinneersut Nunatsinnulluunniit attuumassuseqartut Tivolimi aggustip aallaqqaataani naapittarput.

Tivolimilu ileqquliussamut Nunatsinnullu ilisimasaqarnermut tapersersuitinniarlugu, Sidsel Møller 1990-ikkut naalerneranni Tivolimut attaveqarpoq.

- Kalaallimmi takkuttartut amerliartuinnarput. Aamma kalaallit pillugit oqarusipalaartut, kalallillu pillugit aalajangersimasumik isiginnittaaseqartoqartarnera qatsukkakkit. Aamma Nunarput pillugu ilisimasaqarnerusoqarnissaa kissaatigigakku. Taamaammat Tivolimut allappunga, allaanerusumik sammisaqartitsisinnaanersut, Nunattalu piorsarsimassusaanik allaanerusutut takutitsinissamik siunnersuuteqarlunga, Sidsel Møller oqarpoq.

Saafiginneqqaarnerali allannguinngilaq. 2000-imili misileeqqippoq, Tivolimilu aliikkusersuinermut pisortaq, Jan Hertz, tamatumuuna naapippaa, pisortarlu siunnersuummut akuersivoq.

Kalaallillu tuusintilikkaat aaqqissukkami "Kalaallit Nunaat Tivolimi" maanna naapittarput.

- Nunatsinni imminnut ilassineq ajortut Tivolimi naapikkaangamik nuannaaqalutik ilassisarput. Taamaammat ataatsimoornermik misigissuseqartitsinerullunilu qanilaassuseqarnerulertitsisarsoraara, Sidsel Møller oqarpoq.

Møller "Kalaallit Nunaat Tivolimi" siulersuisuinit 2012-imi tunuarpoq.

Aaqqissukkalli qanoq ineriartortinneqarnisaanut suli angusaqarniarpoq.

- Inuppassuit Tivolimi nuannattut taama amerlatigitillugit, immikkoortortamik ilumoorsaarnerusumik immaqa pilersitsisoqarsinnaagaluarpoq. Nunatsinnimi sammineqartariaqartut aamma sammineqarsinnaapput, Sidsel Møller oqarpoq.

"Kalaallit Nunaat Tivolimi" juulip 31-iani aallartippoq aggustillu aallaqqaataani nanignneqarluni.