Kalaallit Nunaat Tivolimi aaqqissuunneqaqqittoq: Ikinnerusut najuukkaluartut isumalluartut
Nunarput pillugu kulturikkut nunatta avataani aaqqissuussat annerpaat sapaatit akunnerata siuliata naanerani pivoq.
Københavnimimi arfininngormat sapaatiummallu Kalaallit Nunaat Tivolimi ingerlanneqarpoq.
Nunattali avataani kulturikkut aaqqissuussani annerpaajugaluarluni ukioq manna aaqqissuussaq siuliinut sanilliullugu minneruvoq.
Tivolip tusagassiinermut pisortaa Torben Plank taama paasissutissiivoq.
- Soorlu covid-19-ip silarsuaq tamaat sunneraa, soorunami aamma Kalaallit Nunaat Tivolimi sunnerpaa. Nalinginnaasumik aggertartut amerlassusaasa affaat missaanniittut aggerput, Torben Plank oqarpoq.
AAMMA ATUARUK Kalaallit Nunaat Tivolimi atuaqatigiiusimasut naapeqqinnerannit tunngaveqartoq
Aallarteqqippugut isumalluarlutalu
Kalaallit nipilersuutaat Danmarkip illoqarfiisa pingaarnersaanni tusarsaapput, kalaallillu nerisassaat illoqarfimmi takussaallutik.
Assersuutigalugu Malik Tukula pattagissamik tusarnaartitsivoq, erinarsoqatigiit Aavaat erinarsorlutik Rasmus Lyberthilu kingulliulluni sapaatiummat tusarnaartitsilluni.
Kalaallit Nunaat Tivolimi pigaangat inuit 40.000-it 45.000-illu akornanni najuuttartut Tivolimit naatsorsorneqarpoq. Coronavirusili tuniluummat, ukioq manna taama amerlatiginngillat.
- Inuit ilaat Kalaallit Nunaannit Danmarkimukarnissartik ajornartippaat, taavalu kalaalerpassuit danskerpassuillu angerlarsimanerupput, Torben Plank oqarpoq.
Aaqqissuussaq siorna taamaatinneqarpoq, aasaq mannalu minnerugaluartoq aaqqissuisut iluarinnipput.
- Siornamut sanilliussissagutta taava siorna tamaat taamaatiinnarneqarpoq. Sunaluunniillu taamaatitsiinnarnerminngaanniit pitsaaneruvoq. Maannakkut aallarteqqippugut, isumallulersillutalu, Torben Plank oqarpoq.
Kalaallit Nunaat Tivolimi 42-ssaannik ukioq manna pivoq.
Pilersaarutit
Arfininngorneq juulip ulluisa 30-anni
14.00 Tikilluaqqusineq, aqutsisoq Carsten Siegstad
14.05 Qilaatersorneq, Lisa Qaavigaq (Gaz-Zaa-Lung)
14.30 Tivoli-Gardenip Havenimi ingerlaaqqatigiinnerat
15.00 Malik Tukula, pattagissamik tusarnaartitsineq
16.30 Tivoli-Gardenip Havenimi ingerlaaqqatigiinnerat
17.00 Uaajeerneq
19.30 Kalaallit erinarsoqatigiivi Aavaat
20.15 INUANIMA, Aviaja Lumholt
21.15 Lardos Company & Muteq
22.30 Ulf Fleischer, tusarnaartitsineq
23.30 Qormoroortarterneq
Sapaat aggustip allaqqaataa
14.00 Tikilluaqqusineq, aqutsisoq Carsten Siegstad
14.05 Qilaatersorneq, Lisa Qaavigaq (Gaz-Zaa-Lung)
14.30 Tivoli-Gardenip Havenimi ingerlaaqqatigiinnerat
16.00 Malik Tukula, pattagissamik tusarnaartitsineq
16.30 Tivoli-Gardenip Havenimi ingerlaaqqatigiinnerat
17.00 Kalaallit erinarsoqatigiivi Aavaat
19.15 Uaajeerneq
19.50 Lardos Company & Muteq
20.45 Rasmus Lyberth
Tusarfik: Tivoli
