Kalaallit Nunaat maligassiuivoq
Taama oqarpoq inuup inuiaqatigiillu pissusiinik misissuisoq, Mark Nuttall, maanna namminersornerup eqqunneqarnissaanut atatillugu Nuummiittoq.
- Maanna pisut Kalaallit Nunaannut soqutiginartorujussuupput. Isumaqarpunga Kalaallit Nunaat nunat inoqqaavinuinnaanngitsoq, aammali nunat immikkoortuinut naalagaaffinngorusuttunut maligassiuisuusoq. Taama oqarpoq Mark Nuttall Kangersuatsiami Upernaviup eqqaaniittumi ilisimatusarluni najugaqarsimasoq. Taanna isumaqarpoq namminersorneq kalaallit inuiattut pisinnaatitaaffiinut attuumassuteqartorujussuusoq.
- Namminersorneq tassaavoq kalaallit inuiattut pisinnaatitaaffeqarnerannik akuerinninneq. Taamaaliornikkut kalaallit inuiattut pisinnaatitaaffeqarnertik anguaat, Danmarkimut tunngatiinnarnagu, aammali nunanut tamalaanut soorlu Naalagaaffinnut Peqatigiinnut tunngatillugu. Mark Nuttall oqarpoq erseqqissarlugulu Kalaallit Nunaata namminersulernermigut pisortat ingerlataannik ingerlaannarluni tigusisussaannginnera.
- Kalaallit Nunaata namminersulernermigut naalakkersuinikkut inooqatigiinnikkullu qanoq ingerlariaqqinnissani siunissarlu ungasinnerusoq isigalugu qanoq pitsaanerusumik ingerlatsisoqarsinnaanersoq eqqarsaatigisinnaanngorpaa.
Namminersorneq pillugu isumaqatigiissut soorunami ingerlariaqqinnissamut pingaaruteqarpoq, taamaalillunimi Kalaallit Nunaata oqartussaaffini annertusarsinnaammagit
Canadami Alberta Universitymi ilisimatooq Mark Nuttall taama naggasiivoq.