Kalaallit Nunaat maleruaanerulerpoq
Naalagaaffiit Peqatigiinni ukioq 1989-imi aalajangiunneqarpoq juunip ulluisa aallaqqaataat tassaassasoq meeqqat ulluat, meeqqat pisinnaatitaaffii pillugit malunnartitsisarfissaq.
Aalajangersagaq taanna Kalaallit Nunaanni atuutsinneqarpoq.
Naalagaaffiit Peqatigiit meeqqat pillugit suliniaqatigiiffiat UNICEF siorna Kalaallit Nunaat meeqqat pisinnaatitaffiinik maleruaannginnerarlugu nalunaaruteqarpoq, Kalaallit Nunaanni meeqqat amerlasuut kaallutik innartarmata.
Misissuisitsinermi paasineqarpoq meeqqat arfiniliugaangata ataaseq kaalluni innartartoq, aammalu meeqqat amerlasuut kinguaassiuutitigut atornerlunneqartartut, tassuunatigullu takussutissaasoq meeqqanut atugassarititat naammaginartuusut.
Ullumikkummita meeqqat atugassaqartitaanerat qanoq ippa? aamma Naalagaaffiit Peqatigiit meeqqat pisinnaatitaaffiinik isumaqatigiissutaat nunatsinni malinneqarpa?
Kinguaassiuutitigut atornerlunneqarsimasut peqatigiiffianni Kialaami siulittaasoq Isak Thorsen siorna pisinnaatitaaffinnik maleruaasoqannginnerarlugu isornartorsiusoq ullumikkut oqarpoq pisinnaatitaaffiit malinneqalersut.
- Meeqqat katsorsartarfeqarnissaannut naalakkersuinikkut suliniuteqartoqalerpoq, suaartaatigineqartalernerisa kingorna alloriartoqalerpoq, naak ullormiit ullormut anguniarneqartut anguneqarsinnaanngikkaluartut, siunissaq qaamanerujussuartut isikkoqarpoq, Isak Thorsen oqarpoq.
Meeqqat inuusuttullu pillugit ilisimasaqarfimmi MIPI-mi allaffimmi sulisoq Aviaaja Absalonsen meeqqat pisinnaafitaaffii Kalaallit Nunaanni maleruarneqarneri ilumut nakkutigineqannginnerat amigaatigaa.
- Siunnersuutigineqartut ilaat malinneqarput, soorlu piitsuussutsip killinganik nassuiaateqartussamik atorfinititsisoqarnikuuvoq, taassumalu suliaa naammassineqangajalerpoq, Aviaaja Absalonsen oqarpoq.
Taassuma saniatigut meeqqat pisinnaatitaaffiinik Kalaallit Nunaanni Naalakkersuisut malinniinnersut Danmarkip naalagaaffianinngaanniit nakkkutigineqanngillat, Aviaaja Absalonsen MIPI-meersoq oqarpoq.
