Kalaallit Nunaat Islandilu makrelit kisinneqarnissaat pillugu suleqatigiilissapput
Avaleraasartuut Tunup imartaani amerlassusii uppernarsarniarlugit isumaqatigiissummut tunuliaqutaavoq.
Ilisimatusarfeqarfiit pineqartut akornanni aalisakkanut immanullu tunngatillugit ilisimatusarnernik siuarsaanissaq anguniarneqarpoq, pingaarstumik Nunatta Islandillu akornanni imartami aalisakkatigut pisuussutit aveqatigiissutigineqartut pineqartillugit.
Ilisimatusarnikkut ingerlatassat suleqatigiissutigineqarsinnaasullu, paasissutissanik piginnaasanillu aveqatigiissuteqartarnissaq, atortuutinik tapertaqatigiittarnissaq, assersuutigalugu angallatinik ilisimatusaatinik, isumaqatigiissutikkut tigussaasumik siuarsarniarneqarput.
Suleqatigiissutissaq tigussaasoq siulleq aasaru 2014-imi ingerlanneqassaaq, tassa islandimiut ilisimatusaatigalugu angallataat, Árni Friðriksson, atorlugu Tunup Islandillu imartaanni avaleraasartuunik misissuisoqassammat.
Misissuinissat juuli aggusteqalerpat ingerlanneqarnissaat pilersaaruaavoq, Tasiilap avannaaniit kujammut Nunap Isuata tungaanut, aammalu Islandip imartaani ingerlanneqassallutik.
Avaleraasartuut Nunatta imartaani aalisakkat takkukkiartortut nutaat ilagaat, biologillu misissuinissaat Tunup imrataani peqassutsimik naliliiniarnerni tunngaviliisussaapput.
Nunatta imartaani misissuinissat Namminersorlutik Oqartussat immikkut ittumik aningaasaliissuteqarnerisigut pisinnaalerput.
