Kalaallit Nunaat isiginiarneqarnerulerpoq
Nunatta pisussutai uumaatsut pissarsiariumallugit Europamiut ilungersorput. Saffiugassat qaqutigoortut nunatsinniittut nunarsuup pisariaqartitaasa sisasamararterutigissagaat missingersorneqareerpoq.
EU-Kommissionip siulittaasuata tullia, Italiamiu Antonio Tajani, nunatsinnut aasaq manna tikeraarani Nunatsinni aatsitassarsiornermik ineriartortitsinissaq pillugu suleqatigiinnissamik Namminersorlutik Oqartussanut isumaqatigiissut atsiorpaa. Antonio Tajani oqarpoq, Europa aatsitassanik peqqumaaateqanngimmat, EU ineriartornermi suleqatisssanik pisariaqartitsisoq.
Namminersorlutik oqartussani ujarassiuut ittuata Henrik Stendal Information-imut oqarpoq, Nunarpuit aatsitassani piaaffigissallugu periarfisaqarluartoq.
- Taamaannera aatsitassarsioqatigiit isaannik ammaavoq, tamannalu Kalaallit Nunaannut pitsaalluinnarpoq, Henrik Stendal oqarpoq.
Nunat suliffissuaqarfioreersut aatsitassanik pisariaqartitsinerujartornerisa saniatigut nunani ineriartortuni, soorlu Kina-mi, Indiami Brasiliamilu aningaasarsiornikkut ineriartupiloornerisa, illoqarfinnut nutsernerup nunarsuullu inuisa 9 milliardtiulernissaasa aatsitassanik pisariaqartitsineq aatsaat taama annertutigilersippaa. Ukiuni kingullerni amikkisaarneq malunnarpoq, tassalu inuussutissanik amigaateqarneq aamma orsussap, saviminissap, sisaap, kanngussaap, minnerunngitsumillu saffiugassat qaqutigoortut akii qaffakkiartupiloorlutik.
Nunat tamakkuninnga peqqumaateqartut nunarsuarmi niuffannermik qitiusumik inissisimalersinnaapput.
Kinallumi tamanna qangalili paasisimavaa, saffiugassanillu qaqutigoortunik niuerneq aqutarilersimallugu aammalu nunaaterujussuarnik naggorissangassanik pisiariortorsimani. Nunat allat taama eqiingatigisimanngillat, maannali angummannialersimallutik.
Pissutsillumi tamakku piviusuuneri paasillualersimallugit EU-p peqartigiilluni suleqatigiinnissamik isumaqatigiisutai nunatsinnuinnaq killissanngillat.
Antonio Tajani naapertorlugu EU Afrikanske Unionilu isumaqatigiissusioqqajaapput, taavalu Chile, Argentina Uruguayilu aatsitassat pillugit isumaqatigiissuteqarfigineqareerlutik. EU-llu aamma Kinamiut Russillu oqaluttuarisaanermi siullerpaamik suleqatiseriniarlugit oqaloqatigai.
EU-p peqatigiilluni suleqatigiinnissamik isumaqatigiissuteqarniarmini ilisimasaqarluarneq teknologikkullu siuarsimalluarneq atorluarniarpai, tamakkualu nunat isumaqatigiissusiorfigineqartussat ineriartornerminni iluaqutigilluassavaat.
