Taamatut isumalluarsaarerpalaartumik siulittuineq nalunaarusiami naammassineqaqqammersumi - sulili saqqummiunneqanngitsumi - Nunatsinni inuutissarsiornikkut ilippanaatilinnik misissueqqissaarneq pillugu nalunaarusiaasumi atuarneqarsinnaavoq.
Nalunaarusiami inuussutissarsiutitigut suliniutissatut periarfissat tikkuartorneqarput, ilaatigut aatsitassarsiorneq takornariartitsinerlu periarfissarissaartutut taaneqarlutik.
- Kalaallit Nunaanni siunissami suliffeqarfimmik ingerlatsisinnaanermut periarfissaqartoq nalunaarusiap oqaatigaa, Henrik Leth Sulisitsisut Peqatigiiffianneersoq oqarpoq.
- Periarfissat soqutiginartut arlalissuit periarfissaapput, Leth oqarpoq.
Taamaattorli Henrik Lethip erseqqissarpaa, ilinniartitaanikkut inuussutissarsiutinillu aaqqissuussinermi aaqqiisoqarpat unammilligassarpassuaqartoq, taamaaliornikkummi Kalaallit Nunaanni inuussutissarsiornikkut nutaaliaasumik imminullu napatissinnaasumik pilersitsisoqarsinnaammat.
Nalunaarusiaq Arctic Business Networkimit, ABN-imit suliarineqarpoq, matumanilu Jyllandip Avannaata Kalaallit Nunaatalu ukiorpassuarni inuussutissarsiorneq pillugu suleqatigiinneranni misilittakkanik aallaaveqarluni.
Nalunaarusiaq aggusti qiteqquppat tamanut saqqummiunneqassaaq, ABN-ip aamma Sulisitsisut Peqatigiiffiata aaqqissugaanik aggustip 20-anni suliffeqarfiit pillugit isumasioqatigiissitsinissaq sioqqullugu.