Kalaallit Nunaat Folketingimi oqallisigileraat
Ukiut tamaasa taamatut oqallittoqartariaqaraluarpoq. Venstrep politikkikkut oqaaseqartua Ellen Trane Nørby aamma Kalaallit Nunaat pillugu oqaaseqartartoq Gitte Lillelund Bech Berlingske Tidendemi ullumi saqqummersumi taama siunnersuuteqarput.
-Taamatut oqaloqatigiinnermi sammisaq kisiat pinnagu, aammali Naalagaaffeqatigiinnerup siunissamut piareersarnissaa pillugu immitsinnut oqaloqatigiinnissarput kissaatigaarput.
Apeqquteqaat aallaavigalugu oqallitsitsiniartut tassaapput partiit illuatungiliuttuusut Venstre, Konservative, Liberal Alliance aamma Dansk Folkeparti.
Naalakkersuisut illuatungiliuttullu Kalaallit Nunaat pillugu sapaatit akunnerini kingullerni oqallinnermi imminnut ungasilligattuinnarsimapput. Naalakkersuisut apeqqutit sammisanut namminersorlutik oqartussat ataaniittunut tunngasut akissuteqarfigiumanngilaat illuatungiliuttullu namminersorneq pillugu isumaqatigiissut nammineq atsiorsimasartik qimarratiginninniarnerarlugit. Namminersorneq pillugu inatsit nalorninartortaqarpoq, atorfillit pikkorinnerpaat misilittagaqarnerpaallu naalliuutigisaannik, politikerit Venstremeersut allapput.
- Ministeriunerup Naalagaaffeqatigiinni oqaloqatigeeqqusinnginnera periarfissanillu ernumagisatsinnillu oqalliseqqusinnginnera akuerinngilarput. Naalagaaffeqatigiinneq pappiaraannakkoortuunngilaq. Naalagaaffeqatigiinneq ineriartortuartuuvoq allanngortiartortuartuullunilu.
Ilanngutassiortutta Folketingimi ullumi oqallinneq malittarissavaa.