Kalaallit Nunaat EU-mut nittarsaappaat
Angalaqatigiit ilaatigut naapippaat EU-kommissær Connie Hedegaard, Europa-parlamentimut ilaasortaq Morten Løkkegaard aamma Europa-Parlamentip siulittaasuata tullia Diana Wallis.
Angalanermi siunertarineqarpoq, paasitissallugu Kalaallit Nunaat tassaaginnanngitsoq puisit amiinik nioqqutilik aalisagartassiisartorlu, aammattaarli nunani tamalaani suliniutinut suleqataarusuttunik Nunatsinneersunik peqartoq erseqqissarneqarusummat.
- Ilaanneeriarluta inuiaqatigiittut pingaaruteqanngitsutut, taamaattumillu immikkut isigineqartariaqartutut imminut isigeqqajaasarpugut. Taamaattorli aamma eqqaamasariaqarparput Issittumi pingaaruteqaleraluttuinnartumi qitiusumik inissisimagatta aamma EU-p USA-llu akunnerpiaaniikkatta. Nunatta eqqaani nunani allamiut suliniuteqartillugit peqataasariarpugut, Nunatsinni Takornariaqarnermi Inuussutissarsiornermilu Siunnersuisoqatigiinneersoq Jan Mørch Pedersen oqarpoq.
Nunatsinni Takornariaqarnermi Inuussutissarsiornermilu Siunnersuisoqatigiit EU-mut attaveqaateqarnissamik siornali suliniuteqarput. Suliffeqarfiit suliniaqatigiiffiillu nunani tamalaani suleqataanissamut soqutiginnittut ataatsimoorfeqalernissaat matumani siunertarineqarpoq - matumani EU-p OLT-mik isumaqatigiissutikkut Nunatsinni suliniutigisai immikkut isiginiarneqarlutik.
Suliniummi peqataasut maanna tassaapput suliffeqarfiit suliniaqatigiiffiillu Nunatsinneersut 22-t.