Kalaallit Nunaanni saarulleqatigiiaat assigiinngitsut arlaqarput
Saarulliit amerleriapiloornerannut manniit aalisagaaqqallu imaata sarfaanit ingerlaartinneqarlutik Islandimit aallaveqarsimanissaat maannamut ilimagineqarsimagaluarpoq. Oqaluttuarisaanerullu allaaserineqarnerata allanngortinnissaanut piffissanngorpoq.
Pinngortitalerimmi DTU Aquamilu Silkeborgimiittumi ilisimatuut aalisakkanit misissugassatut tigusatoqqat aalisakkanit sinerissamit tamarmeersunit nallersuussillutik misissuisimapput. Taakkulu aallaavigalugit biologit Kalaallit Nunaanni saarulliit saarulleqatigiinnut ikinnerpaamik sisamanut immikkoortitersimavaat. Taakkunannga saarulleqatigiit pingasut Nunatta imartaanni suffisarput, saarulleqatigiillu sisamaat Islandip imartaanut suffiartortarlutik.
- Misissuinerup inernerisa pissanganarnersaraat, 30-ikkunni 50-ikkunilu saarulliit amerlipiloornerisa nalaanni kitaata ikkarnersaanni misiligutitut katersat aalisakkanut ullumikkut nassaarisinnaasatsinnut assingusuummata. Taamaammat taamani aalisarluartoqarneranut saarulleqatigiit ilaasa Kalaallit Nunaata imartaanni amerliartorsimanerannik aallaveqarsimasutut isikkoqarpoq, Nina Therkildsen, ilimatuut suliniummi suleqataasut ilaat Polarfrontenimut oqarpoq.
Saarullinniarneq 60-ikkunni ingerlalluarnerpaavoq, ukiumut 400 tonsit sinnerlugit pisarineqartarlutik. Ilisimatusarneq Kalaallit Nunaanni saarulliit qanga amerlassusaat anguneqassappat pissutsit suut pisariaqarnerinik paasiniaanissamut atorneqarsinnaavoq.
