Kalaallit Nunaanni partiit Savalimmiuni partiinit akisunerupput
Kalaallit Nunaanni partiit tallimat ukiumut 8,5 millioni koruuninik tapiiffigineqartarput, Savalimmiunilu partiit arfinillit ukiumut 4,7 millioni koruuninik tapiiffigineqartarlutik.
Inatsisartut siulittaasuata Josef Motzfeldtip, Savalimmiuni pissutsit allaanerunerat pillugu ima oqarpoq:
- Asserssuussinerussappat oqaatigineqarsinnaavoq nunat taakku marluk angissutsimikkut assigiinngissusaat taavalu angallanniarnikkut pissutsit nunani taakkubnani marlunni atugaasut, qanoq naalakkersuinikkut suliniarnermut sunniuteqarsinnaanerat.
Inatsisartunut ilaasortat ukiut pingasut matuma siorna akiliutsillutik angalasarsinnaatitaapput. Inatsisartuni ilaasortat tamarmik angalanerat 1,5 millioni koruunit missaannik akeqarluni.
Nunatsinni inatsisartuni ilaasortat angalasarnerisa akiat Savalimmiuni inatsisartunut ilaasortat angalanerisa akiannit 2 millioni koruunit sinnerlugit amerlanerupput. Savalimmiuni inatsisartut suleriaasianni oqaatsit ataatsit atorlugit ingerlanneqartarpoq, nunatsinni oqaatsit marluk atorneqarlutik, tamatumalu kinguneralugu nunatsinni partiit sulinerminni nutserisoqarnermut aningaasartuuteqartarlutik.
Kalaallit NUnaanni inatsiartuni ilaasortat partiivinut tapiissutigineqartartut ukiumut 8,5 millioni koruuniusut pillugit inatsisartut siulittaasuat Josef Motzfeldt ima oqarpoq:
- Ukiormanna aningaasamut inatsimmi aningaasat taama amerlatigisut partiinut tunniunneqassapput, taavalu inatsisartut allattoqarfiannut aningaasaliissutit aqunneqartarsimagaluarlutik partiinut agguaanneqassapput, taamaalillutillu partiit qanoq amerlatigisunik inuttaqarnerat aallaavigalugu tunniunneqartalernissaat inatsisartuni akuersissutigineqarpoq, Josef Motzfeldt oqarpoq.
Partiinut tapiissutit malunnanngiusartumik ukiorpassuarni tunniunneqartartut ukiumit nutaamit pisortanit aningasaaliiffigineqarsimasutut allassimasalissapput, kikkunnit tamanit takuneqasinnaasunngorlugit.