Kalaallit Nunaanni Filminstituti siullerpaamik aqutsisortaartoq
Kalaallit Nunaanni Filminstituti siullerpaamik aqutsisoqalerpoq.
Inunnguaq Petrussen decembarip aallaqqaataanni atorfinissaaq, taanna allaffissornikkut kulturimullu tunngasunik misilittagaqarluarpoq, Ilinniartitaanermut, Kultureqarnermut, Timersornermut Ilageeqarnermullu Naalakkersuisoqarfik tusagassiuutinut nalunaarummi allappoq.
Kalaallit oqaluttuarfigisinnaassagaat
Inunnguaq Petrussen Kalaallit Nunaanni Filminstitutimi aqutsisutut institutip siorna pilersinneqartup aallartisarnera ineriartortinneqarneralu siulittaasuuffigissavaa.
- Kalaallit Nunaata Filminstitutianik pilersitsinikkut toqqammavissat pilersinneqareerput Filminstitutillu pisortartaavata Inunnguaq Petrussenip pitsaasumik angusaqarfiussussamillu suleqatiginissaa qilanaaraara, Ilinniartitaanermut, Kultureqarnermut, Timersornermut Ilageeqarnermullu Naalakkersuisoq Nivi Olsen oqarpoq.
Filminstituti kulturikkut aningaasaqarnikkullu ineriartornermi siuttutut inissisimassaaq, aamma kalaallit nipaasa oqaluttuaasalu - nunatsinni nunanilu allani - tusaaneqarnerulernissaanut siuttuussaaq.
Inunnguaq Petrussenillu tamanna suliarissallugu qilanaaraa.
- Atorfimmut pissanganartumi nutaajusumilu aallartinnissara qilanaareqaara. Filmiliortortatta periarfissaasa amerlisarneqarnissaat, nunattalu qissiminneqarnera atorluarlugu filminstitutteqalernikkut periarfissanik ujartueqataaffiginissai qilanaarivara
Kulturikkut ineriartornermi siuttuussasoq
Inatsisartut filmiliortarnerup, filmertarfeqarnerup festivalertitsisarnerillu nunarput tamakkerlugu siuarsarneqarnissaa pissutigalugu kalaallit filminstitutiannik pilersitsinissaq siorna aalajangerpaat. Institutip filmiliortartut TV-kkullu aallakaatitassiortartut nunanit allaneersut nunatsinnukarsinnaanissaat kajuminnarnerulersissavaa, kiisalu nunatsinni filmiliortarnerup eqqumiitsuliatut ingerlanneqarnissaanut ineriartortitsissalluni.
Inunnguaq Petrussenip Kalaallit Nunaanni Filminstitutip aqutsisutut siullertut saqqummiunneqarsinnaanera nuannaarutigalugu, Kalaallit Nunaanni Filminstituti sinnerlugu siulitaasoq, Malik Kleist oqaaseqarpoq.
- Filminstitutimik ingerlalluartumik siunissamullu isiginnittumik kalaallit filmiliaannik kulturiannillu nunatsinni nunanilu allani saqqummersitsisarnissatsinni siuttussatsinnik siulersuisut suleqateqarnissartik qilanaaraat.
