Kalaallit Nunaanni Eqqartuussiviit coronavirusi pissutigalugu matuneqarallartut
Coronavirusi pissutigalugu eqqartuussiviit ajornartorsiornermi upalungaarsimaneq tallimanngornermiit aallartippaat – tamannalu sapaatip akunnerini marlunni sivisutigissasoq, Nunatta Eqqartuussisuuneqarfiata tusagassiuutinut nalunaarutigaa.
Kalaallit Nunaani Eqqartuussiviit arlalinnik immikkoortortaqarfeeraqarpoq, taamaattumik pitsaanerpaamik qulakkeeriniarlutik, inuiaqatigiinni suliassat pinartut suliassaqarfinniittut suliarisinnaajumallugit, sullissineq suliassanut kinguartinneqarsinnaanngitsunut killilerneqassasoq aalajangiunneqarpoq.
Inuit ornigullutik saaffiginnissinnaanerat Eqqartuussiviit matugallarpaat. Innuttaasulli mailikkut attaveqarnissaat kajumissaarutigaarput, Nunatta Eqqartuussisuuneqarfiata tamanna nalunaarutigaa.
AAMMA ATUARUK Innersuussutit nutaat: Nunatsinnit nunatsinnullu angalasoqarnaveersaartoqarli
Kalaallit Nunaani Eqqartuussiviit Danmarkimi pisortat assigalugit upalungaarsimanermik aallartitsiniarput, suliassat maannamuugallartoq sapaatip akunnerini marlunni pinartut suliarisinnaajumallugit.
Sulianut allakkiat tamarmik suliakkiissutillu, eqqartuussivimmut qarasaasiakkut nassiunneqarsinnaagallarput. Tamanna aamma akiliisinnaajunnaarnermik sulianik aallartitsinissamik noqqaassutinut assigisaanullu atuuppoq.
Eqqartuussivinnut allakkat qarasaasiatigullu allakkat ullut tamaasa isumagineqartassapput.