Kalaallit Nunaanni Brugseni: Kalaallit pisiassanik amigaateqassanngikkaluarput!
Kalaallit Nunaanni Brugsenit pisortaa, Olav Thomsen amigaateqarnerujussuaq pillugu ima oqarpoq.
- Pisiniarfinni pisiassanik amigaateqartalernitsinnut pissutaaqataasut ilagaat, umiarsuit assartortut akuttunerusumik illoqarfinnut tikisinneqartalermata. Siornatigut sapaatip akunneranut ataasiarluni tikittaraluartut maanna ullut 14-nikkaarlutik tikittalerput. Olav Thomsen oqarpoq.
Pisiassat amingaataanerulersartut tassaanerupput naatitat aammalu nioqqutissat immummit tunisassiat. Kalaallit Nunaanni Brugsenit pisortaata oqaatigaa, pisiassanik nunguutsisarneq aallartittoq, Royal Arctic Line-p umiarsuarnik pajuttunik ukiuunerani illoqarfinnut tikisitsisarnera akuttortinneqarmat.
- Kalaallit Nunaat ullumikkut atugarissaarfiuvoq, pisiassanik nutaanik amigaataaffiusussaanngitsoq. Umiarsuit ukiuunerani pajuttut tikittarnerisa akuttornerisa kingunerisaanik pisiniartartut nutaanngitsunik taamaallaat pisiassaqarnerulerput. Tamannalu Namminersorlutik Oqartussat siunniussaannut akerliusutut oqaatigineqarsinnaavoq. Olav Thomsen isornartorsiuivoq.
Kalaallit Nunaanni Brugseni Pisiffik peqatigalugu Royal Arctic Linemut saaffiginnipput, pissutsit eqqartorniarlugit.
Royal Arctic Linep oqaloqatigiinnissaq akuerigaluarlugu taamaattoq ukiuunerani umiarsuarni pajuttuinerup allanngorteqqinneqarnissaa orniginartinngikkallarpaa. Tamanna pillugu Royal Arctic Linep tuniniaanermut immikkoortortaqarfiannit Jakob Strøm ima oqarpoq:
- Maannakkorpiaq tunngavissaqanngilagut umiarsuit tikittarnerisa allanngortinneqarnissaannut. Atuisut ajornartorsiutaat suunersut paaseqqaarlugit, allannguisoqassappat soorunami allanngortitsinissarput eqqartorneqarsinnaavoq, kisiannili allannguineq uagutsinnut ajornerulersitsinngippat aatsaat tamanna eqqartorneqarsinnaalluni. Royal Arctic Linemi paasissutissiisartoq Jakob Strøm oqarpoq.
Ullut qulikkaarlugit umiarsuarnik pajuttunik tikisitsisarneq taamaallaat ukiuunerani, tassa januaarimiit aprilip tungaanut pisarpoq. Ukiup sinnerani sapaatip akunneranut ataasiarluni umiarsuaqartarpoq.
