Kalaallit nipilersugatoqaat saqqummersinneqarput
Cd-it assaapput aqaatit qilaatersornerillu Pituffimmi Qaanaamilu 1906-imiit 1984-ip tungaanut immiunneqartarsimasut.
Nipilersukkanik qangarnisanik ilisimasallip Michael Hauserip, aamma tusagassiortup Karsten Sommerip, kalaallit nipilersugatoqaat immiussat akunnernik 800-nik sivisussuseqartut tusarnaartarsimavaat. Immiussat avani Qaanaami, Tunumi Kitaanilu immiussaapput.
Nipilersukkat immiunneqarneri Nuummi Danmarkimilu toqqorsivinnit nassaarineqarsimapput, amerlaqisullu iluamik tusarnaarneqarsimanatik. Nipilersukkat sapinngisamik immiunneqarnerattut nipeqartilerniarlugit nipigissarneqarsimapput. Inngernerit ilaat qimussimik ingerlaajutigaluni immiussaapput.
- Erinnat, tusarnersunik eriagisassanik misigisanillu nuannersunik imaqartut, nalitsinni inuusuttut nuannersumik pissarsinartumillu misigisaqartitsinnaapput, Karsten Sommer CD-t atuagartaanni aallaqqaasiummini allappoq.
Katillugit cd-t tallimat saqqummersinneqassapput. Siulliit marluk Thulemi Qaanaamilu immiussat, ICC-p Nuummi ataatsimeersuarneranut atatillugu ippassaq saqqummersinneqarput.
Cd saqqummersinneqartussaq tulleq qilaatersortartup Imîna Imînap qilaatersugaanik imaqassaaq kingulliillu Tunumiut Kitaamiullu erinarsugaannik qilaatersornerannillu imaqartut ilaatigut palasip taalliortup Henrik Lundip erinarsugaanik.
