Kalaallit meerartaat killilersorneqarusupput
Suliniut unnugu aallarnisaleriissaaq tassami DR-ip aallakaatitaani DR Ramasjangimi isiginnaarneqarsinnaassammat ”Live fra Ramasjang: Børn i bussen”. Aallakaatitat arfineq marluusut taanna siullersaraat tassanilu pingaarnermik sammineqarput angajoqqaat meeqqamik tungaannut akisussaassuseqarnerat.
- Meerartatta inuunitsinni pingaarnerpaanerat uagut inersimasut oqaluttuarissallugu nangaassutiginngisaannarparput, kisianni oqaatsit kusanartut timitalernissaat ajornakusoorajuttarpoq. Ulluinnarni ulapaarfiusuni inersimasut qanoq ililluni eqqumaffiginnilersinnaanera qanilaarnerulersinnaanerallu pillugu meeqqanik pingaarutilimmik oqaloqatiginninnissamut filmit aallarniutitut atorniarpavut, DR B&U-mi aaqqissuisoq Per Schouby oqarpoq.
Paasisitsiniaaneq ”Suli anaanamik! Suli ataatamik!” angajoqqaat akisussaaffeqarnerannik oqaluuserinninnissamut meeqqat namminneq kissaataannik aallaaveqarpoq. NAKUUSA Youth Forum Illulissani 2011-mi ingerlanneqarmat suut pingaartillugit sammineqarnissaat meeqqat namminneq aalajangerlugulu oqaasertalerpaat, tamatumalu kingorna juunimi 2012-imi Kalaallit Nunaanni Meeqqat Isummersorfiat angajoqqaat annerusumik pitsaanerusumillu akisussaaffeqalernissaannut inassuteqaatinik qulinik suliaqarpoq.
- Paasisitsiniaaneq manna meeqqat sutigut tamatigut paasisitsiniaanerivaat. Meeqqat kissaataannik, pisariaqartitaannik pisinnaatitaaffiinillu angisuumik naqissusiivoq – meeqqat namminneq oqaasii atorlugit oqaluttuarineqartumik. Meeqqaniit angajoqqaanut tamakkiisumik asanninnermik nalunaarutiginninneruvoq, paasisitsiniaanerullu nunamut tamarmut siammarnissaa qilaanaarisorujussuuvarput, UNICEF Danmarkip pisortaanera Steen Andersen oqarpoq.
”Suli anaanamik! Suli ataatamik!” 2013-imi marsip tungaanut ingerlassaaq. Paasisitsiniaanermi filmiliat arfineq-marluk KNR-imi takutinneqartussat saniatigut allagartarsuarnik ilaatigut mittarfinni, kommunip allaffiini pisiniarfinnilu nivinngaatiterisoqassaaq. Kalaallit Nunaanni meeqqat pisinnaatitaaffiinik suliniaqatigiiffik MIO suleqatigalugu atuakkamik angajoqqaanut isumassarsiorfissamik akeqanngitsumik suliaqartoqarpoq, paasisitsiniaanermilu oqariartuutit aamma nerrivimmi ullaakkorsiorfimmiilissapput, immuit puuinut Arla ikkussuissammat
- NAKUUSA suliniutaavoq nutaaliortoq, piffissallu annikittup iluani angusaqarluarsimasoq. Taamatumunngalu qularnanngitsumik patsisaavoq Ilaqutariinnermut, Kultureqarnermut, Ilageeqarnermut Naligiissitaanerullu Naalakkersuisoqarfia UNICEF Danmarkillu qanimut naligiittutullu suleqatigiinnerat”, taama oqarpoq Ilaqutariinnermut, Kultureqarnermut, Ilageeqarnermut Naligiissitaanerullu Naalakkersuisoqarfiup immikkoortortaqarfiani pisortaq Susie Marthin Kjeldsen.
