Kalaallit meerartaasa nappaatigisartagaat misissuiffigineqalersoq
Tamakku pillugit tatiginartunik ilisimatuussutsikkut misissuisoqarnikuunngilaq. Misissuinerit kingulliit ingerlanneqartut pisoqaapput, misissuinerillu taamani takutippaat nunami maani meeqqat Danmarkimi meeqqanut sanilliukkaanni takissutsimikkut minnerusut oqimaassutsikkulli assigalugit. Taamani misissuinerit aamma takutippaat Kalaallit Nunaanni meeqqat alliartornerminni alliartortarnerat allaanerusumik ingerlariaaseqartartoq, kalaallillu meerartaasa timaasa ilusaat immikkuullarissuseqartartut.
Paasissutissat tamakku massakkut 2012-imi aamma ilumoortortaqarnersut, Marius Kløvgaardip ilisimatuussutsikkut misissuinermini paasiniassavaa.
- Misissuinerup siunertaraa erseqqissarneqassasoq meeqqat qasseriarlutik nakorsiarsimanersut, napparsimmavimmut qasseriarlutik unitsitaasimanersut, suut ajoqqutigisimaneraat, pilersaarutaasartut malillugit akiuussutissanik kapitinnerit ingerlanneqarsimanersut, qanga nalunaarsukkanut naleqqiukkaanni meeqqat takissusaat qanorlu oqimaatsiginerat qanoq allanngorsimanersut, Marius Kløvgaard oqarpoq.
Kalaallit Nunaanni meeqqat ukioqanngitsuniit 18-it tikillugit ukiullit amerlassusaat Danmarkimi meeqqanut sanilliukkaanni amerlanerujussuupput. Kalaallit Nunaanni innuttaasut 26 procentii 18-it ataallugit ukioqarput, Danmarkimi inuttaasuni inuusuttut 18-nit ataallugit ukioqartut 15 procentiullutik.
Inuusuttut napparsimaleraangamik napparsimanerat qanoq ingerlariaaseqartarnersoq naluneqarpoq, tamannalu Marius Kløvgaardip 2011-imi Ilulissani taartaalluni sulinermini tupigusuutigisimavaa. Ilisimatuussutsikkut misissuinerit amigaatigineqartutut nalilereeramigit, kandidatitut ilinniarnermini inaarsaalluni allaaserisaqarnermini samminiarlugu aaliangersimavoq.
- Kalaallit meerartai soqutigisarilersimavakka. Kalaallit Nunaanni immikkut meeqqanut nakorsatut atorfeqartoq ataasiinnaavoq, maniinnernilu meeqqat peqqissusaat pillugu eqqarsaatit amerlasuut puttussuupput, Marius Kløvgaard oqarpoq.
Marius Kløvgaard Nuummut Ilulissanullu oktobarip 15-ianiit novembarip 16-iata tungaanut angalassaaq, inuit ullutsinni napparsimaleraangamik nappaataat qanoq ingerlariaaseqartarnersut ilisimatuussutsikkut misissussavaa, kalaallit meerartaasa ukiut siulliit qulinngiluat ingerlaneranni oqimassusaat takissusaallu qanoq ineriartortarnersut ilisimatuussutsikkut misissussallugu.
Misissuinermi Marius Kløvgaardip suleqatigissavai nakorsaaneq ph.d. Henrik Thybo Christensen, biologi ph.d. Nina Odgaard Nielsen, Ilulissani nakorsaq Thomas Lund Sørensen, Nuummilu meeqqat nakorsaat Britta Louise Olsen.
