Kalaallit meeqqat pinngitsaalillugit nuutsitaasut pillugit isiginnaagassiat siullersaat
Tamanna Aarhusimi Godsbanenimi Åben Scenemi pissaaq, isiginnaartitsisartoqatigiinnit P.R.A.A.K-mik imminnut taagortunit isiginnaagassiaq “Inuit” takutinneqassalluni.
Pinngitsaaliilluni Danmarkiliartitsineq atukkiarineqarlunilu filmiliarineqarsimavoq, pisimasorli pillugu isiginnaagassiami qanittumik takorluuinertalimmillu kinaassuseq immikkut sammineqarpoq, ilitsersuisartoq Aarhusillu Universitetiani dramaturgimik ilinniagaqartoq, Mie Kanø, KNR-imut taama oqarpoq.
- Kinaassuseqarani qanoq-innersoq misissorlugu samminiarparput. Kinaassuseq erseqqissoq inuit ikitsuinnaat pigisaat. Matumanili erseqqinnerusumik sakkortunerusumillu saqqummersinneqassaaq.
Danmarkip oqaluttuarisaanerata taartortaa
Mie Kanø siorna nunatsinniinnermi pisimasoq oqaluttuassarsiarisimavaa, siornatigullu tusarsimannginnera tupaallaatigalugulu mamiatsaatigisimavaa.
- Danmarkip oqaluttuarisaanerata taartup ilaa tusarsimanngisaannagara, ilitsersuisartoq oqarpoq.
Mie Kanøp isiginnaartitsisartullu isiginnaartitsissutissartik kingorna piareersarlugu aallartippaat. Qitinnermik, isiginnaartitsinermik taallanillu imaqarpoq. Filminulli assersuutissagaanni isiginnaartitsissummi 'pisoq qaninnerusumik sammineqarpoq', ilitsersuisartoq taama isumaqarpoq.
- Isiginnaartitsinikkut allaanerusumik oqaluttuartoqarsinnaavoq. Oqaluttuarnerinnaanani misigissutsinik aamma takutitsilluarsinnaavoq.
Isiginnaartitsissut ullumi pingasunngornermi siullerpaamik takutinneqassaaq, tallimanngornerullu tungaanut Aarhusimi Godsbanenimi takuneqarsinnaassalluni.
