Kalaallit kinguliaat digital-inngorput
Nunatta allagaateqarfianni toqqortalerisoq Niels H. Frandsen kalaallit kinguliaannik misissuisimavoq. Niels H. Frandsenip avannaamiut kinguliaqutaannik kisimi ilisimatusarsimaneranut peqqutaavoq kujataani allattaavissuit Hans Hedtoftip umiunerani 1959-imi annaaneqarmata.
Kalaallit europamiutuulli kinguliaqarusuttalersimapput ajoqersuiartortitat suliartortullu 1700-1800-kut tikittalernerisa kingorna. Kalaallit kuisittut siulliit ilaat kinguliartaartarsimanngillat, qanorlu pisoqartarsimanersoq Niels H. Frandsenip nassuiarpaa.
- Tassa kalaallit kuisimanngikkallaramik ileqqorivaat ataasiinnarmik ateqartarlutik, kuisikkaagamillu atsiussisarsimapput ateq kinguliarlu tamaasa ilanngullugit soorlu Poul Egede, Niels H. Frandsen oqarpoq.
- Kinguliaq -senimik naggateqarpat takuneqarsinnaanngilaq kinguliat qallunaaneernersoq kalaallineernersorluunniit, ataataq kalaaleq qallunaarluunniit Peter-mik ateqaruni taava kinguaariit Petersenimik kinguliaquteqalertarsimapput, Niels H. Frandsen oqarpoq.
Kinguliat -senimik naggateqanngitsut tamarmik qallunaaniinngillat. Ilaannannguilu Niels H. Frandsenip taajorpai:
- Løvstrømimik, Fleischermik Heilmannimillu kinguliallit kinguliaat amerlanertigut Europami nunani tamalaaneerput.
Allattaavissuit tassa kirkebogit Nunatta Allagaateqarfiata nittartagaanut www.arkiv.gl nuunneqarneri ullumi Ilimmarfiup auditoriani qaaqqusanut saqqummiunneqassapput. Tassa nittartakkakkut kinaluunniit misissuisinnaalissaaq kinguliani sorlassiorlugu.