Kalaallit isiginnaartitsisartut tyskit nersualaarpaat
Isiginnaartitsisartoqatigiit "Das Letzte Kleinod"-it isiginnaagassiaanni, Tysklandip avannaani qeqertami najugallit 1700-kunni Diskobugtimi arfanniartarsiamanerannik oqaluttuanik tunngavilimmi Vivi Sørensen aamma Makka Kleist peqataapput. Isiginnaagassiap oqaluttuaraa arfanniat ukiuni marlussunni Kalaallit Nunaannereerlutik ilaquttaminnik naapitseqqinnerat.
- Vivi Sørensenip aamma Makka Kleistip isiginnaagassiaq uppernassuseqalersippaat, aviisi Inselbote allappoq. Aviisi aamma allappoq, isiginnaagassiaq pilersaarusiugaalluartoq aamma isiginnaartunik tiguaalluartoq.
Isiginnaagassiami tyskisut kalaallisullu oqalunnerit isiginnaartunit iluatsittutut oqaatigineqarpoq.
Sapaatip akunnerata tulliata naajartornerani kalaallit isiginnaarnissaminnut periarfissinneqassapput, isiginnaagassiaq "Ernerit tammaraluartut" imaluunniit tyskisut "Die Verloren Söhne" Katuami isiginnaartitsissutigineqassooq, kingusinnerusukkullu Uummannami aamma takutinneqassalluni.