Kalaallit inuuniarnermikkut ajornartorsiortut inuusulligaluttuinnarput
Inuusuttut inuuniarnermikkut ajornartorsiuteqarlutik Aarhusimi Kofoeds Skolemut saaffinnittartut amerligaluttuinnarneri kisiartaanngitsoq aammali anaanat kisermaat maanna saaffiginnittalersimasut, Aarhusimi Kofods Skolep pisortaata, Michael Alberip aamma oqaatigaa.
- Ajoraluartumik ilaanni naammattuugaqartarpugut anaanat inuusuttut meeqqatik nassarlugit Kofoeds Skolemut saaffiginnittut, nalornisut qanoq iliussanerlutik, Michael Alber oqarpoq.
Aarhusip kommuniani kalaallit inuuniarnermikkut qassit ajornartorsiuteqarnersut mississorneqarneri 2008-mi naammassineqarpoq. Taamani paasineqarpoq kalaallit 150-it missaanniittut inuuniarnermikkut ajornartorsiuteqartuusut. Kisitsilli tamanna ullumikkut qaffasinnerujussuusoq, Michael Alderip oqaatigaa.
- Ikinnerpaamik 200-it sinneqalersimapput immaqa suli amerlanerullutik. Qanoq amerlatigerpiarnerannik ilisimasaqannginninnut pissutaaneruvoq, kalaallit imminnut ikioqatigiinissaminnut pikkoriffeqaramik aammalu ilisimavarput ajornartorsiuteqartut ilaat imaaliallaannaq takuneqarsinnaasanngimmata, Michael Alder oqarpoq.
Kalaallit ajornartorsiuteqartut ornittagaanni Kofoeds Skole-mi København-imiittumi pisortap oqaatigaa inuusuttuaraanerusut inuuniarnermikkullu ajornartorsiutillit amerligaluttuinnartut, tamannalu ernumanartutut, Kurt Olsenip oqaatigaa.
- Kalaallit inuusuttuaqqat inuuniarnermikkut ajornartorsiuteqareersut amerliartorneri ernumanartutut oqaatigisariaavoq. Maani Københavnimi ornittakkami Naapiffimmi kalaallit ajornartorsiutillit 300-t missaaniit 350-t tikillugit ukiumut saaffiginnittarput, Kurt Olsen oqarpoq.
Siunissamiku ikioqqullutik takkuttartut amerligaluttinnarnissaat ilimaginerarlugu.
- Siornatigut tikittartut eqqarsaatigalugit maanna amerliartornissaat ilimanarluinnarpoq tamannalu ernumanarpoq, tassami tikittartut ukiukilligaluttuinnartut takusalerpavut, taakkulu siunissaminnik pitsaasumik pilersaaruteqanngitsutut oqaatigineqarsinnaallutik, Kurt Olsen oqarpoq.
Inuussuttuaqqat amerlanersaat inuunerminnik ajornartorsiuteqareerlutik Danmarkimut nuuttarput. Kofoeds Skole-mi Aarhusimiittumi pisortap Michael Alber-ip oqaatigaa, inuusuttut aatsaat Danmarkimut tikittut, inuuniarnerminnik ajornartorsiuteqartunik allanik Danmarkimeereersunik naammattugaqarnissaat qanittuararsuusartoq.
- Maanga saaffiginnittartut amerlanersaat inuuniarnermikkut ajornartorsiuteqareersuusarput. Taakkulu ikiorniarnissaannut uangut danskit pikkoriffigut killeqarput tassami inunnik isumaginninnermut sullissinerput oqaimaatsutut isigineqarsinnaammat, Århusimi Kofoeds Skole-mi forstaderi, Michael Alber taama oqarpoq.
Kalaallit Danmarkimut nuutut siorna 3.000-it missaaniipput Nunatsinnullu nuutut 2.300-t missaanniillutik. Tassa ataatsimut isigigalugu Nunatsinni inuit 700-it missaannik siorna ikilipput.
