Kalaallit inuit timersuutaanni sisamanik ujaminnapput
- Kalaallit ukioq manna angusarissaartorujussuupput, top 10 5-illu akornannut pisaqattaarlutillu, assut angusaat iluarisimaarnartorujussuuvoq, Arctic Sports Greenlandimi siulittaasoq, Helga Nielsen, World Eskimo Indians Olympicsimi Alaskami Fairbanksimi unammiuaartoqarnerani kalaallit tallimat unammiartut angusaat pillugit taama oqarpoq.
Inuit indianerillu nunarsuarmi pissartanngorniuullutik unammiuaarneranni pinnguaatini assigiinngitsuni unammisoqarpoq.
-Ukioq manna eqitamut, Minik Platou Qasigiannguaneersoq, pissartanngorpoq nunarsuarmi. Eqitarnermini ajorsanngiivilluni unammisai 60-t sinneqarput, ingerlarsuinnaavilluni ajorsanngiivilluni ajugaavoq, Helga Nielsen oqarpoq.
Iluliarmiu Frederik Petersen WEIO-mi aama angusarissaartarpoq, puisimillu pilannermi bronzennappoq. 5 kilometerimullu arpannermi normu 2-ngornermini WEIO-mi rekordiusoq qaangerpaa.
- Angusai pitsaasorujussuupput tupaallannarlutillu, naak aatsaat misilikkaluarlugu. Taava arpannermi normu 2-ngorpoq, rekordi qaangerneqarpoq. Frederikkut arpakkamik rekordiit WEIOp qaangerpaat, normu 1-p normu 2-llu, Helga Nielsen oqarpoq.
Helga Nielsen unammisaqattaarnernut assigiinngitsunut aamma peqataasarpoq, taanna atisalersullaqqinneqqusaannermi kalaallisoorluni unammeqataanermini gultinnappoq.
-Tassa alutorsaatigineqartorujuuvoq. Ukioq kingulleq aamma kalaallisoorpunga kisianni unammeqataannginnama. Ukioq manna unammeqataangama normu 1-nngorpunga.
