VIDEO Kalaallit Illuutaat politiinik ikiuerusuttoq

Wilhelm Amossenili Aalborgimi angerlarsimaffimmi silataani februaarip 17-iani toqummat taama pisoqanngilaq. Ilaqutaasut sapaatit-akunneri marluk qaangiummata aatsaat kalerrinneqarput iliseqataajartunngitsoorlutillu.

Folketingimut ilaasortap Doris Jakobsenip (S) ilaqutaasut siunissami kalerrinneqartarnissaat qanoq qulakkeerniarneqarnersoq danskit inatsisinik atortitsinermut ministeriannut apeqquteqaatigaa.

Attavigineqarsimannginnertik paasiuminaatsippaa

Aalborgimi Kalaallit Illuutaanni pisortap, Søren Stach Nielsenip, pineqartumi Kalaallit Illutaata politiinit attavigineqarsimannginnera paasisinnaanngilluinnarpaa.

- Innuttaasunut kalaallinut maani najugaqartunut attavippassuaqarpugut, Søren Stach Nielsen KNR-imut erseqqissaavoq, oqaatigalugulu ilaqutaasut nassaariniarnissaat ajornanngitsuaraasimassagaluartoq.

Aamma atuaruk Kalaallip angutip toqunerata kalerriutigineqarsimannginnera politiit ajuusaarutigigaat

- Kalaallit maani (Danmarkimi, aaqq.) najugaqartut ilisarisimasarpassuaqarput. Ilaqutaasullu nassaariniarnissaat ajornanngitsuararsuuvoq.

- Siunissami assingusumik pisoqaqqinnginnissaa anguniarlugu politiit sianerfigalugit attaveqarfigissavakka, KNR-imut taama oqarpoq.

Politiit attaveqarniarput

Aalborgimi Politiit, pisup sammineqarnerata kingorna, ajuusaarlutik nalunaaruteqarput, Kalaallit Illuutaallu suleqatigalugu suleriaatsiminnik piaartumik misissuissamaarput.

- Kalaallit Illuutaat ulluni tullerni attaveqarfigissavara, assingusumillu pisoqaqqinnginnissaa anguniarlugu pisortatigoornerusumik attaveqaqatigiinnissarput aaqqiissuteqarfiginiassavara, Jyllandip avannaata Politiivini vicepolitiinspektøri Henrik Skals taama oqarpoq.