Kalaallip angutip toqunerata kalerriutigineqarsimannginnera politiit ajuusaarutigigaat

Aalborgimi kalaallip angutip februaarip qaammataani toqukkut qimagunnerata kingorna ilaqutaasut ilisimatinneqarsimannginnerat Danmarkimi Jyllandip avannaata Politiivisa ajuusaarutigaat.
marsip 12-at 2015 05:40
Nutserisoq Simon Uldum -

TV2 Nord taama allaaserisaqarpoq.

Nanortalimmiu 64-inik ukiulik Wilhelm Amossen februaarip ulluisa 17-ianni toqukkut qimaguppoq. Aalborgimi najukkami silataani uummamminik unittoorpoq. Tamanna sioqqullugu sanilerisani peqqusimavaa ambulancenut sianeqqullugu, taamaalioreermallu inissiamit silamut anillappoq uppillunilu. Ambulancermiut uummarsaraluarpaat iluatsitsinatilli.

Ilaqutaasulli toqusoqarneranik napparsimmavimmit politiiniillu kallerinneqanngillat. Toquneranit sapaatit-akunneri marluk qaangiutereersut aatsaat ilaqutaasut ilisimatinneqarput. Tamannalu pivoq Wilhelm Amossenip ikinngutaasa toqusup ilisaanissaanut aqaguttoq, marsip pingajuani, namminneerlutik Aalborgimi politeeqarfimmut saaffiginnissuteqarmata, tamannalu pissutigalugu Nunatsinni ilaqutaasut ilisinermut aamma peqataasinnaasimanngillat.           

Oqartussaasut suliamik ingerlatsisimanerat Aalborgimi Kalaallit Illuutaanni pisortamit Søren Stach Nielsenimit Folketingimullu ilaasortamit Doris Jakobsenimit isornartorsiorneqarpoq.

Jyllandip avannaata Politiivini viceinspektørip Henrik Skalsip tamanna ima oqaaseqarfigaa:

- Qanoq pisoqarsimanera eqqarsaatigalugu, Kalaallit Illuutaannut saaffiginnissimasariaqaraluarpugut. Taamatut pisoqarnerata kinguneranik suleriaatsivut misissussavagut.