Kalaallit Illuutaat juullimut niuffatsitserujussualersoq
Kalaallit Illuutaata Københavnimi Løvstrædemi sapaatip akunnerata naanerani juullimut niuffatsitsinerujussuarmik aaqqissuussinerani 38-nik niuerfiusinnaasunik takutitsiveqassasoq, Kalaallit Illuutaat nittartakkaminni allappoq.
- Puisit amiinik aaqqatilianik, isersimmatinik assigisaanillu piserusuttunit decembarip qaammataani ornigarneqarluartorujussuuvugut. Taakkulu niuertarfeeqqatsinni ajoraluartumik tuniniarneq ajorpagut, taamaammat kalaallit sanalutaannik piserusuttunut juullimut niuffatsitsinissaq periarfissatsialaavoq, Kalaallit Illuutaannit allapput.
Arfininngorpat nalunaaqutaq aqqanermiit sisamanut sapaatiuppallu aqqanermiit tallimanut juullimut niuffatsitsisoqassaaq.
Kalaallit Illuutaata aggiasoqarluarnissaa naatsorsuutigaa:
- Juullimut niuffatsitsigaangatta illu inunnik ulikkaavittarpoq.