Kalaallit Illuutaat Aalborgimiittoq illoqarfiup qiterpasissuanut nuulersoq
![](/sites/default/files/styles/image_934x467/public/article_images/det_gronlandske_hus_aalborg_google_streetview.png?itok=Ua94Q3gS)
Kalaallit Illuutaanni pisortap Søren Stach Nielsenip Illup Aalborgip qiterpasinnerusortaanut nuunneqarnissaa kissaatigalugu siorna nalunaarutigaa. Taamaaliornikkut Illumik atuisunut, bussinik qimuttuitsunillu Aalborgiliartartunut, ornikkuminarninngussammat aammalu Illup saqqumilaarnerunissaa anguneqarsinnaassammat.
Peqatigiiffiit ataatsimoorfissaqalissapput
Kalaallit Illuutaat Vesterbro 79-imi Aalborgimi akunnittarfiit pisoqaanerit ilaat Hotel Fønix sanilerilissavaa. Illu kvadratmeterinik 736-nik angitigissaaq immikkoortortaqarfiillu tamaasa ataatsimoortinneqassapput.
- Isumaginninnermut immikkoortortaqarfipput ilinniartitaanermullu immikkoortortaqarfipput maannakkorpiaq immikkoorput, maannalu ataatsimoortissinnaanngussavagut. Aammattaaq Kalaallit Illuat ilisimasanik katersuivittut atuutilissaaq, Søren Stach Nielsen oqarpoq.
Aamma atuaruk Aalborgimi Kalaallit Illuutaat nuulersoq
Inuussutissarsiornikkut attaveqaqatigiiffiit sisamat aamma tassaniilissapput; Arctic Consensus, Arctic Business Network, Arctic Education Network aamma AAU Arctic.
Nunatta Issittullu Jyllandip avannaani sammineqarnerulernissaannik tamanna siunertaqarpoq.
- Nunatsinnik soqutiginnittunut ataatsimoorfissaqartitsilissaagut. Ilimasavut iluaqutiginiarlugit saaffigineqarsinnaavugut Nunatsinnilu pissutsit pillugit akissutissarsisoqarsinnaassalluni. Aammattaaq Nunatsinneersut Jyllandip avannaa pillugu paasissutissanik pissarserusuttut uatsinnut saaffiginnissinnaapput. Tamanut atuutissaaq, Søren Stach Nielsen Vejgaard Avisimut taama oqarpoq.