Kalaallit Illuutaata pisortartaava: Danskit politikerit kalaallit pillugit ilisimasaqarnerusariaqarput
Nunarput Issittorlu Danmarkimi politikkikkut oqallinnermi ukiuni kingullerni malunnartumik sammineqaleraluttuinarpoq.
Danskilli politikeriisa kalaallit kultuariannik ilisimasaqarluaqqajanngillat. Kalaallit Illuutaanni Atlantikullu avannaamioqatigiivisa illuanni siorna aggustip qaammataani pisortanngortoq, Nauja Bianco, taama isumaqarpoq.
- Nuummi 1976-imi inunngorpoq tassanilu peroriartorluni. Danskimik anaanaqarpoq kalaallimillu ataataqarluni.
- Naalagaaffiit pissusiinik Odensemi, Aarhusimi Frankrigimilu Lillemi ilisimatusarsimasuuvoq. Aarhus Universitetianit Cand.scient.pol.-iuvoq.
- Belgiami, Danmarkimi Canadamilu najugaqarnikuullunilu nunat avannarliit ministeriisa Danmarkimi siunnersuisoqatigiiffianni tassa Nordisk Ministerrådimi danskillu nunanut allanut tunngasunut ministereqarfianni atorfeqarnikuuvoq, taavalu Canadami siunnersortitut namminersortuunikuulluni.
- Avinnerullunilu pingasunik qitornaqarpoq.
- Ataatsimut isigalugu isumarpunga, nunarput Danmarkimi nunamilu tassani politikkikkut aaqqissuussaanermi ilisimaneqanngippallaartoq. Sutigut tamatigut taamaappoq, taanna oqarpoq.
Taannalu misigisimavoq, tamatuminnga allanngueqataanissaq suliassamik ilagigaat.
- Inooqatigiilluarumalluta taavalu nunatsinni Danmarkimilu inuit attaveqatigiilluaqqullugit ilisimasariaqakkatut pingaarutilinnik qaammarsaanissaq suliassama ilagaat.
Nauja Bianco nunat avannarliit ministeriisa siunnersuisoqatigiiffianni Nordisk Ministerådimi Danmarkillu nunanut allanut tunngasunut ministereqarfiani siornatigut atorfeqarpoq.
Taanna kalaallimit danskimillu kingoqqisuulluni Nuummi peroriartorpoq, aamma meeraallunili misigisimavoq nunatta Danmarkillu ataqatigiinnerunissaannut suleqataasariaqarluni.
Kommunit aamma Kalaallit Illuutaat tapertariissasut
Atorfittaaminilu taamaalioqataarusuppoq, ingammik inunnik isumaginninnermi.
Meeqqat ikiortariallit angerlarsimaffiup avataanut ullutsinni inissinneqartarnerannit siusinnerungaatsiartumit inissinneqartalissasut danskit naalakkersuisuisa kalerriutigereeraallu, meeqqanik angerlarsimaffiup avataanut inissiisarneq Danmarkimi oqallisaaleruttorpoq. Danmarkimi ilaqutariit kalaallit tassani aamma pineqarput.
AAMMA ATUARUK Odensemi Kalaallit Illuutaat aamma Atlantikup avannaamioqatigiivisa illuat nutaamik pisortassarsineqartut
- Danmarkimi meeqqat kalaallinit kingoqqisut angerlarsimaffiup avataanut inissinneqartartut danskinit angerlarsimaffiup avataanut inissinneqartartunit amerlanerusut ilisimavarput. Tassa imaappoq, ajornartorsiut tamanna nukissaqarfigivallaarsimanngisarput iliuuseqarfigisassaavoq, Nauja Bianco oqarpoq.
Tassa Kalaallit Illuutaat meeqqanik kalaallinik angerlarsimaffiup avataanut inissiilersaartoqarnerani kulturit assigiinngitsut marluk akornanni akunnermiliuttuunissaat pisariaqartoq, Nauja Bianco isumaqarpoq.
- Akunnermiliuttuunermik oqarama kalaallisuumiit qallunaatuunngortitsineq qallunaatuumilluunniit kalaallisuunngortitsineq kisiisa pinngilakka - kulturit assigiinngitsut marluk akornanni sutigut tamatigut akunnermiliuttuunissaq aamma pivara.
Kalaallit Odensemi Illuutaat ilaqutariinnut kalaallinut angerlarsimaffiup avataanut immaqa inissineqartussanik meerartalinnut ikiuunnerusalissasoq, taassuma kissaatigaa.
- Annertoqqutaanikkut inissiinerillu pisariunerannik taakkunanilu ilungersunartunik aalajangiinernut paasinninnikkut, Nauja Bianco oqarpoq.
Atuisut ilarpaalui coronamik ajornartoornermi atuisuujunnaartut
Nauja Bianco coronap Danmarkimi tuniluutileqqaarnerani atorfinippoq. Kalaallit Illuutaat decembarimili aamma matoqqapput. Kalaallit Illuutaannik atuisut mailikkut, oqarasuaatikkut nittartakkakkullu maanna attavigineqartarput.
Kalaallit Illuutaannik atuisooreersut Danmarkimi killilersuisoqarunnaarnerani orniguteqqittalernissaannut sulineq imaannaanngittuarsinnassasoq, Nauja Bianco isumaqarpoq. Kalaallit Odensemi Illuutaata Danmarkimi kalaallit ikiortariallit kiserliortullu oqartussanit allanit immaqa alaatsinaanneqanngitsut immikkut aamma aallutissavai.
AAMMA ATUARUK 428-t coronamik tunillanneqarsimasutut siumorneqartut
- Kalaallit Illuutaannut ujariatsinermisulli ammaqqikkutta orniguttaleqqinnissartik ileqquliuutseqqikkuminaassinnaavaat. Taamaammat ileqquliuusseqqinnissaannut sulineq qularnanngitsumik imaannaanavianngilaq, Nauja Bianco oqarpoq.
Danmarkimi killilersuigallarnerit februaarip naanerata tungaanut atuupput.
